السبت، 2 يوليو، 2011

وحشتينى اوي يا منونه .. كل سنه و انتى طيبة يا حبيبتى





السلام عليكم و رحمة الله و بركاته


ازيكم يا كل المدونين




انا عارفه انى لو قولتلكم وحشتونى و المدونة وحشتنى مش هتصدقوني علشان قولتها كتير و برده ببعد تانى


بس بجد و الله دي الحقيقة و بحب المدونة جدا و بحب عالمها و عالم المدونين جداااااااا


و يكفيكم فخر ان عالمكم اصفى عالم و عدم وجود التنافس الضار و الحرب مش موجوده هنا بينكم رغم انكم كلكم ناجحين ما شاء الله


و يا رب دايمااااااااااااااااا


بعدين ما انا قارفاكم عالفيس هههههههههههه بس اكيد جو التدوين مختلف جدا


------------------------


بس انهارده بئا انا جاية مخصوص مش بس علشان اسلم عليكم


ده كمان علشان حاجه كبيرة اوي و غالية عندي و عندكم كلكم اكيد




عـــــــــــــــــــــــــــــــــــــيـــــــــد مـــــــــــــــــــــــيــــــــــلاد
مـــــــــــــــــــــــنـــــى درويــــــــــــــــــــــش




ياااااااااااااااه يا منى


وحشتينى اوي اوي


بعدتي عننا بس عمرنا ما هننساكي و لا هننسى احلى ايام قضيناها معاكي


لسه اسمك عندي في قايمة الاخوات


و كل يوم بقعد قدام القايمة و ابص على اسمك رغم ان الاكونت ملغي


بس كفاية ان اسمك لسه موجود


و هيفضل موجود


مش بس في قايمة الاخوات عالفيس


في قايمة الاخوات في البيت و في القلب و كل حاجه :)




كل سنه و انتى احلى منى


كل سنه و انتى طيبة و حنونه و جميلة و صافية زي ما انتى يا حبيبتي






video

الجمعة، 18 مارس، 2011

دستور

تقولها بضم الدال او بفتحها مابتفرقشي معانا كتير
اصل المعنى واحد عندنا

و خصوصا لما اتطلب مننا و لاول مرة في حياتنا اننا نروح نشارك في الاستفتاء لتعديلاته

دي اول مرة في حياتنا !!!!

مش بس كده
ده اول مرة في حياة اهلنا !!!!

ده اخر حاجه كانوا فاكرينها كانت انتخابات مجلس الشعب
و حتى دي كمان كان بيحصل فيها ساعات تزوير

ايوة اول مرة في حياتنا نحس فيها ان صوتنا له قيمة و ان قعدت البيت مش ارحم من البهدلة مع البلطجية و في الاخر نلاقي الوظايف اترستأت قبل ما المبنى يتبني
!!!!!!!!!!

معنى كده و بفرحتنا اللي ما تتوصفشي احنا و اباءنا و امهاتنا و اجدادنا كمان
ان احنا ناخد راحتنا عالاخر و نروح و نشارك و كأننا خارجين يوم العيد
بس في نفس الوقت احنا عاملين زي اللي اتكتف سنين طويلة
صعب اوي انك فجأة تقوله قوم امشي و حرك ايدك و رجلك

ده احنا لاول مرة رايحين نقرر مصير بلدنا يا اخوانا

و علشان كده في ناس قررت تخليك متكتف و ماتقومشي من مكانك
و قرروا يجيبولك هما الراي لحد عندك

و انت يا دوووب بس تروح تعلم عليه و تحط صابعك في الحبر
كفاية كده انت هتقطع نفسك و لا ايه

ده انت ممكن تمشي في الشارع تلاقي يفط كتير اوي على طول الطريق
نعم للتعديلات الدستورية ... مع تحيات كذا

او تلاقي عربية معدية و عليها ميكرفون بيقولوا فيها نعم للتعديلات الدستورية

او تدخل عالنت تلاقي فيديو متشير ميت مرة
فلان و فلان و فلان بيقولوا لا للتعديلات الدستورية

فجاة يطلعلك فيديو تانى
علان و علان و علان بيقولوا نعم للتعديلات الدستورية

و طبعا فلان و علان دول كلمتهم مسموعه عند ناس كتير و بيتأثروا بكلامهم

يا ريتها وقفت على اد كده
ده حددولك كمان لون الدايرة اللي هتعلم فيها
يعني كمان مش هتحتاج تتعب نفسك و تبص تشوف نفسك بتعلم على ايه
!!!!!!!!!!!!!!!!

هو مش المفروض الاستفتاء ده نزيه
يعني اروح اشارك لوحدي ؟؟؟
و لا لازم اروح و انا معايا رأي حد تانى غيري ؟؟؟؟

مش كان يكفي ان كذا او فلان او علان دول يشرحوا بمنتهى الامانه الدستور و بنوده لكل اللي مش فاهمه او اللي مالهومشي في القانون ؟؟؟؟

ما انتم لما تعملوا اعلان على حاجة معينة و تغيروا من نفسية الناس و من رأيهم تجاة الشيء اللي قرروه ده مش يبئا اسمه حجر على الرأي ؟؟؟


و للاسف ده نتج عنه ان في ناس كتير اوي بقت خايفة تحس بحريتها و تقرر من دماغها فيكونوا السبب في مشكلة زي ما قال فلان و لا البلد تخرب زي ما قال علان

اسمحولي .....
مش مطلوب منكم غير انكم تفهمونا و تشرحولنا بمنتهى الامانة بدون تدخل رأيكم الخاص

ما ينفعشي تشاركوا في تقييد و تكتيف الشعب اكتر من كده

الشعب ما صدق يحس بالحرية
ما تخنقوش حريتهم بدعوى انكم بتمسكوا ايدهم علشان تعدوهم الطريق
لا سيبوهم يعدوا لوحدهم
و لو حبيت تساعده يبئا تشاورلوا من بعيد على الطريق و سيبوه

الشعب ده خلاص عرف يعني ايه حرية و نفسه اوي يطبقها عملي

الثلاثاء، 15 مارس، 2011

فئوية فئوية

لينك مقال " شوفت انهارده ؟ " في جريدة الثوار
-------------------------------------
فئوية فئوية
بعد ما كانت سلمية سلمية
بمعنى
دلوقتي بئا كل واحد عايز يغير اي حاجه او عايز يصلح حياته الخاصة من وجهة نظره هو بس
يبئا المفروض يعمل مظاهرة
و ده القانون السائد دلوقتي مع معظم الناس
حتى بعد ما طلع قرار ان المظاهرات الفئوية ممنوعة

فلان و فلان عايزين يتثبتوا
اه الحكومه قالت ३ سنين تعاقد
بس دول ما كملوش ال३ سنين
مش مهم ......
يلا بينا نعمل مظاهرة يمكن يثبتونا و نبئا طلعنا بحاجه من الثورة
!!!!!!!
ده على اساس انهم ماطلعوش باي حاجه من الثورة !!!!!!

و ممكن جدا تلاقي ناس بتعيب على ناس تانية عملوا مظاهرة فئوية
و يقولوا
" هما دول ناقصهم ايه علشان يتظاهروا ؟ "
في نفس الوقت اللي هما كمان بينظموا مظاهرة فئوية ليهم
اللي يطلعلهم فيها حد تانى يسال نفس السؤال اللي فات !!!!

و طبعا لامتصاص غضب الناس بتقوم الجهات المسؤلة بتنفيذ مطالب دول و دول و دول

و ده اتسبب للاسف انه يكون في فعلا ناس بتتظاهر على حاجات مالهاش حق فيها
زي اللي يجمع ناس و لو حتى من اصحابه و قرايبه و يعملوا مظاهرة ضد فلان ( رئيس مصلحة مثلا )
لمجرد ان فلان ده كان ضايقه مرة زمان و لسه شايلهاله في قلبه
فعقابه من وجهة نظره انه يعمل ضده مظاهرة علشان يذله
و ممكن تكون المظاهرة لا تتعدى العشرين شخص

بس لامتصاص غضبهم بتقوم الجهة المسئوله بتنفيذ طلبهم
حتى لو كان فلان ده اللي بيتظاهروا ضده بريء من كل الاتهامات اللي وصفوه بيها
و لما تيجي تسال السيد المسؤل يقولك " امري الى الله حكم القوي "
!!!!!!!!!!!!!!!

انا عن نفسي اكاد اجزم ان مافيش حد من اللي بيعمل المظاهرات الفئوية دي شارك بجد في الثورة
لانه بجد لو كان تعب و شاف اللي شافوه اللي شاركوا في الثورة علشان نجاة البلد دي
ما كانشي فكر في نفسه لحظة واحده

ليه سيبنا نفسنا من التفكير في البلد

مافرحتوش لما شوفتوا ان مصر كبرت في نظر العالم كله ؟؟؟

مش نفسكم تشفوها دايما كبيرة و عاليا ؟؟؟

ليه ما بتفكرشي في نجاح غيرك و نجاح بلدك ؟؟؟

ليه ما بتفكرشي في صنع نجاح خارج عملك الاداري في اي مصلحة حكوميه ؟؟؟
ما هو كتير من المظاهرات دي قامت علشان اللي عملوها يستقروا على مكاتبهم مطمئنين بمرتباتهم و مراوحهم
ليه مافكرتش تبئا ناجح في مجال تانى تفيد بيه نفسك و بلدك ؟؟؟

بس لو بطلنا نفكر في مصالحنا الشخصية و نبدا نفكر في نجاحنا و نجاح بلدنا
اعتقد ان لو كل واحد فكر في نجاحه و تثقيف نفسه و عمل ثورة على نفسه و غيرها و بالتالي غير اللي حواليه
اعتقد ان كده هنرتقى ببلدنا و تفضل مصر كبيرة في عيون كل العالم زي ما كبرت في نظرهم ايام و بعد الثورة
و افتكروا دايما ان علو شأن مصر يعني علو شأننا
يعني حلم يستاهل اوي اننا نكمله للاخر
تمنياتي ليكم بالنجاح الدائم

الأحد، 13 مارس، 2011

شوفت انهارده ؟؟؟

تحديث ....
لينك البوست اللي فات بعد ما نشر في جريدة الثوار- ثوار مصر
-----------------------
شوفت انهارده ؟؟؟
انهارده كان اول يوم في الدراسة في جامعات كتير .... يا ترى خدت بالك من حاجه ؟؟؟
انا بئا شوفت .....
شوفت انهاردة في اول يوم في جامعة الازهر
بنات لابسين ابيض في ابيض و حاطين علم مصر باشكال مختلفة على اكتافهم و شريطة على راسهم
و فجاة نزلوا بكمية يفط و لزقوها عالحيطان و الشجر و كل حاجه تنفع يتحط عليها و كل حاجه ماينفعشي يتحط عليها
بجد ما كانشي ناقص غير انهم يقومونا من على مكاتبنا علشان نشيلهم يفط و بالمرة نفضيلهم مكاتبنا علشان يعلقوا عليها يفط :)
و مكتوب عليها بالنص " الاخوان المسلمين يرحبون بالطالبات بالفصل الدراسي الجديد " و " الاخوان المسلمين يهنئون الطالبات بنجاح الثورة "
مع كامل احترامي بس جوايا كلام كتير اوي اللي ينفع اقوله و اللي ما ينفعشي اقوله و هسيبهولكم تردوا عليه انتو
بس معلش يعني ( مين اللي بيرحب بمين في الجامعة ؟ هما كم واحده اصلا ؟ و بيرحبوا ببيهم على اساس ايه ؟ و ايه نوعية الترحيب ده ؟ )
بس كده كفاية ...
انا بحترمهم جدا و بشجع حرية الرأي بس اسالة كتير راودت فكري
بعد شوية لقينا بنات كتير واقفين بيطالبوا بطلبات و فجاة و من غير اي كلام ناموا !!!
اتاري في حد وزع منشور على البنات و قالهم لازم تطالبوا بحقكم و فرجهم على كم بند يمسوا الطالبات و مناهج الدراسه و الكتب و كده
و بالتالي معظم البنات انفعلت و قامت تندد و تطالب بالبنود اللي في المنشور
فجاة اكتشفوا ان معظم البنود مالهاش علاقة بالطالبات خااااالص
و بتنادي برحيل فلان و نقل علان من الاداريين و اتهامهم اتهامات باطلة في الفساد المالي و الاداري و الاخلاقي
مع العلم ان فلان و علان دول منهم ناس الطلبه ما تعرفهومشي اصلا !!!!
و بعدين الطالبات ايه اللي عرفهم ان في فساد مالي و اداري في الكلية ؟؟؟؟
ساعتها لفت نظري انهم وقفوا و بدأوا مظاهرة من غير ما يقروا الورقة اللي اصلها في ايدهم !!!
و ماخدوش بالهم من عملتهم الا لما حد راح قالهم
طيب انتو تعرفوا فلان ده ؟ طيب هو مين ؟
هههههههههههههه و الله حاجه تضحك جداااا
فكروني بنوت الازازة في البزازة اللي قبل ده
ربنا يهدي .......

الجمعة، 11 مارس، 2011

مشكلتنا هي الازازة في البزازة و الفيل في المنديل

ركزوا اوي لانه فيه اكتر من معنى و المعاني المقصودة في بطن الشاعر كبيرة و كتيرة :) :)
-------------------------
الازازة في البزازة و الفيل في المنديل و الفلة في المنفلة و المورتة فقعر الحلة
دي جمل اشهر من نار على علم اتقالت في فيلم شنبو في المصيدة للنجم الرائع فؤاد المهندس لما كان فؤاد المهندس بيجسد شخصيتين شنبو الطيب و جناب الكوماندا المهم
فاكرين المشهد اللي العصابة خدت شنبو الطيب يحكمها علشان افتكروه هو الحكيم العاقل اللي يقدر يحكمهم بجد ( ده على اساس انهم مجرمين فاختاروا اقوى و احكم و اعقل و اقوى مجرم فيهم علشان يحكمهم )
فعلشان ماكانشي عندهم بصيرة و لقلة عقلهم خدوا شنبو بدالوا
و كانت النتيجة انه بئا بيحكمهم بهبل
لا و ايه و كمان بيمشوا ورا ارائه الهبلة رغم انهم مش مستعقلنها

نرجع تانى لجملةالفيل في المنديل و الازازة في البزازة
لما كان شنبو بيحكمهم في وقت من الاوقات علشان يعميهم عن حاجات معينة خلاهم يطلعوا ينفذوا مهمه و كان بيحركهم بالريموت
كل ما يقولهم الازازة في البزازة ينزلوا يضربوا بعض
و اول ما يقولهم الفيل في المنديل يسيبوا بعض و يحاولوا يروحوا يكملوا المهمه
و ساعاتها يرجع تانى يقولهم الازازة في البزازة علشان يضربوا بعض تانى !!!!!
مع انهم ولاد عصابة واحده و اصحاب و بينهم عشرة كبيرة
يبئا ليه يسمحوا لنفسهم انهم يسيبوا واحد زي ده بضغطة زرار و بكلمة منه يضربوا بعض ؟؟؟؟

بالظبط للي فهم كلامي اللي فات و استعقله على اللي بيحصل في البلد الايام دي
ليه العلاقة بين المسيحين و المسلمين متحفزة لضغطة زرار او كلمة توقيع و تحريض بينا ؟؟؟؟
رغم ان احنا عايشين مع بعض مش هقول مافيش فرق بين مينا و محمد و الكلام ده
بس احنا بجد اخوات و اكتر من الاخوات و كل تعاملتنا طول العمر مع بعض كده
يبئا ليه نسيب مابينا زرار احمر ملتهب لاي حد عايز يتوهنا عن حاجات هو عايزها يضغط على الزرار ده ؟؟؟؟؟؟
رغم ان احنا عارفين مين الشخص او الاشخاص دي
بس برده بنسيبهم يقولولنا بكل مزاج يلا اضربوا بعض و لما يخلصوا المهمه و علشان مصلحتهم برده بيقولنا الفيل في المنديل

حد فيكم يقدر يقولي ايه اخبار محاكمة مبارك ؟؟؟؟
ايه اخبار طلبات محاكمة نظيف و صفوت الشريف ؟؟؟؟؟
ايه اخبار محاكمات قيادات امن الدولة ؟؟؟؟
فين راحوا الاعضاء السابقين للحزب الوطنى ؟؟؟؟
يا ترى جمال مبارك كان بيعمل ايه الايام اللي فاتت ؟؟؟؟
محدش يقولي انه قاعد بيعيط و حاطط ايده على خده
فين و فين و فين و فين ؟؟؟؟؟؟؟

ها ؟ لحد امتى هتسيبوهم يكملوا معاكم حكاية الفلة في المنفلة و الفيل في المنديل ؟؟؟؟

مش نفسكم نرجع نكمل مسيرتنا ؟؟؟؟
مش نفسكم تشوفوا كل من استحل دمنا و استخف بادميتنا يتحاكم و يا ريت يتشنق في ميدان عام ؟؟؟؟

اكسروا الزرار الاحمر اللي بينا ده و كملوا المسيرة علشان بلدنا تبئا احسن بلد و احسن شعب شافوا التاريخ
و ماتسمحوش تانى لحد يقولكم الازازة في البزازة :)))

video

الاثنين، 21 فبراير، 2011

لو حد قالك اتبرى من مامتك ؟؟ بالظبط كرسي الرئاسة


الرئيس كل ما بيطول في الحكم اكتر كل استقتل علشان يقعد عالكرسي اكتر ... و لو بالدم

حتى لو كان الرئيس ده زي ما بيقولوا
( عضمه في أوفه ) :))
لانه خلاص الكرسي ده بيبئا اقرب ليه من امه و ابوه
.... لو حد قالك اتبرى من امك و ابوك هتقدر ؟؟؟؟




مثال .....

زين العابدين بن علي : قعد २३سنه عالكرسي
اه لزق فيه

بس قعدوا يشدوا فيه يشدوا فيه لحد ما اخر مرة هما وقعوا على الارض و هو طار في الهوا !!



حسني مبارك : قعد عالكرسي ३०سنه كانت النتيجة ايه

الشعب كله قعد يشد فيه يشد فيه لحد ما وقعوا عالارض و هو وقع فوقهم :)))))



القذافي بئا : قعد 43سنه عالكرسي تفتكروا بئا هيحصل ايه ؟؟؟

اولها انتقم شر انتقام من اللي فكروا بس يقولولوه اتبرى من امك و ابوك ... سيب الكرسي !!!

اسيبه ازاي يا ولاد تووووووووووووت ( ده طبعا رد القذافي )



بس اللي انا متأكده منه

انه كل ما الرئيس افرط في العنف مع معارضينه كل ما كتروا اكتر

و كل ما عندوا معاه اكتر

و استموتوا علشان يمشوه .... و عقدوا العزم اكتر و مشوه اسرع

بس للأسف محدش فيهم قادر يفهم ده

مش احنا قولنا امه و ابوه :)))))))


الاثنين، 7 فبراير، 2011

شكرا ليكم و انا اسفة يا مصر

مش عارفه اقول اكتر من شكرا

يا كل من رجعتولنا كرامتنا
يا كل من ضحى بنفسه و بماله و بكل شيء في سبيل مستقبل وطننا و مستقبلنا

يا كل من فكرت في توفير لقمة نضيفه للفقير و انت غني و مش محتاج

يا كل من فكرت في حياة كريمة لغيرك و انت من اساسه عايشها

يا كل من حاولت بكل مجهودك و اكتر علشان تلغي خوفنا

يا كل من فكرت اعلاء كلمة الحق و انت حياتك كريمة و مش فارق معاك

كلمة شكرا مش كفاية

ربنا اعلم باللي جوايا
و جوه كل مصري في اللحظة دي

مافيش دموع تكفي
انا اسفه يا مصر .. و يا كل اهل مصر
انى ماكنتش من اول المنظمين لثورة الحرية
و انى مش من شهداء ثورتك العظيمة


سالي زهران .. احد شهداء الحرية

ماتت بضربها على راسها بالشوم لحد ما انكرست جمجمتها

و غيرها مئات ... اختلفت الطريقة و النتيجة واحدة

مافيش شكر يكفي تضحيتكم لينا

بس يا رب نكون عند حسن ظنكم و مانضيعشي تعبكم

لا دلوقتي و لا في المستقبل اللي صنعتوه لينا