السبت، 26 ديسمبر، 2009

كل سنة و انتم طيبين و مع مطلقات راديو ان شاء الله مبسوطين

حبايبي الحلوين كل سنة و انتو طيبين و على طول متجمعين و دايما محبوبين و للسما مرفوعين
(( مع تحياتي ماما دعاء مش ماما فضيلة ))
بجد كل سنة و انتو كلكوا طيبين و بخير دايما يا رب و السنة الجاية تكونوا كلكوا محققين اغلب امانيكم و طموحاتكم

طبعا لكل المتابعين انا سيبت المدونة فترة طويلة و ده كان بسبب شوية مشاكل على شوية مشغوليات اللي كانوا مخليني شبه الدميه اللي بتتحرك بس ماهياش عارفه رايحه فين ولا جاية منين (( بس و الحمد لله وقف جنبي ناس كتير بعد ربنا طبعاً و بجد هما دوا اصدقائي الحقيقين على راسهم طبعا محاسن سنسن حبيبتي و منامينو و شيكو الضد و حنين ( همس الاحساس ) بشكرهم كلهم جدا و بقولهم ربنا يخليكوا ليا و ما يحرمنيش منكم ولا يحرمكم من الصداع اللي بعملهولكوا كل شوية )) و بشكر كل اللي تابعونى و كانوا بيعلقوا عندي و بيسألوا عليا (( ربنا يخليكم ليا يااااااااا رب ))


اه و كمان كان فيه شوية فرسه بسبب انى كل ما اكتب مع نفسي موضوع تطلعلي واحده (( هيا عارفه نفسها مش اي واحده ها )) و تقولي (( انتى بتعملي ايه ؟؟؟؟ انتى كده هتحرقي مواضيع برنامجك في الراديو !!!!! )) اقوم قافله الكراسة بتاعتي و اقعد حاطة ايدي على خدي (( لحد ما خدي اتعوج من حطة ايدي عليه ))


المهم ما اطولش عليكم (( قولوا طولي )) سيبت المدونة بس برده كنت بشقر عليها من وقت للتاني و كنت بتابع بعض مواضيعكم (( مش كلها علشان بس قلة فضى مع مخ مشغول بالمشاكل بس و الله كانت مواضيكم كلها بتعجبني ))

وساعات كنت بقرا بعض بوستات قهرا كده لما حد من اصحابي و صحباتي يقولي خدي اقري الموضوع ده (( منتهى القهر اللي في الدنيا )) (( بهزر طبعا ده كلهم حلوين و مقطقطين )) بس و الله كنت ببئا مبسوطة اوي و كمان بوستاتهم كانت بتخرجني من الجو اللي كنت عايشاه فكانت بتعملي انتعاشه


و اخيراً الحمد لله اخيرا و ليس اخراً مطلقات راديو هينزل و هعرف اكتب بئا في مدونتى حبيبتي براحتي من غير ما حد يزعقلي و هقول كل اللي نفسي فيه (( احمدك يااااااااا رب ))

المهم بئا ركزوا اوي في الحته اللي جايه دي

افتتاح مطلقات راديو قرب يا جدعاااااااااااااااااااااااااااااااااااااااااااااااااااااان
مش بس كده ده هيكون يوم 1/1/2010 الساعه 6 مساءا على الهواء مباشرة زي متشات الكورة

عارفين يعني ايه افتتاح الراديو يوم 1/1/2010 يعني عندي حاجات كتييييير اوي اوي اهمهم بئا انى هروح اشوف اصحابي اللي بجد ، و كمان علشان اخيرا هنفتتح مطلقات راديو (( تعب الشهور هايجي بفايده )) ، و كمان علشان عيد ميلادي (( صحيح انا زعلانه لاني كبرت و تمت الربع قرن - هو مش 25 سنة ربع قرن برده - اه اصلي خايبة موت في الحساب - بس مبسوطة برده لانه عيد ميلادي ))

المهم بئا يا ريت يا ريت يا ريت كلكم تتابعونا و تقولولنا رايكم و تشاركونا الفرحه و مستنينكم استنونااااااااااااااااا




الخميس، 24 سبتمبر، 2009

كل سنة و انتو طيبين /// انا و الفيس بوك و سمسمة و نمنمة

كل سنة و انتو طيبين وحشتوني بجد
انا اسفه انشغلت عن المدونة و اهملتها و مابقتش حتى برد ولا بعلق بس و الله كان غصب عني
كان عندي مشاكل في الشغل كانت متلوهاني على الاخر رغم اني مغلطتش في حد و مكنتش مركزة في اي حاجه علشان اكتبها ولا حتى مركزة في اي حاجه بقراها
بس هو الغلبان كده مالوش عيش في الدنيا
و على فكرة انا لسه مهيسة من اثار المشاكل بس انتوا وحشتوني فقولت ارجعلكم بأي موضوع المهم اني ارجع وسط الناس اللي بعزها و بحبها بجد من قلبي من تاني
المهم متشكرة جدا لكل الي سأل عليا و عيد عليا و خصوصا اختي ( تأثير الفراشة )و محاسن ( انا عايزة اتطلق )

ـــــــــــــــــــــــ.......ـــــــــــــــــــــ
انا و الفيس بوك و سمسمة و نمنمة

من يجي سنة نهى اختي عملتلي اكونت على الفيس بوك و قالتلي تعالي و اشتغلي عليه و اتعلميه و كل مرة اقولها ابعدي عني فيس بوك ايه انا دماغي مش في كده خالص
و لما قابلت يوم تصوير العاشرة مساءا اسلام جاويش ( اصحي يا مصر ) و محمد كمال ( صوت من مصر) قالولي انتي لازم تدخلي الفيس بوك و تتعلميه بصراحة حمسوني و قولت ابئا أتعلم من نهى ازاي اعرف اتعلم عليه (( عيب اوي الاصغر مني ما شاء الله عارفين كل حاجه و انا قاعدة زي خيبتها )) و اتعلمته على بسيط و سيبته تاني كم يوم
و فجأة بدأ رمضان و بدأت مشاكل الشغل و رغم اني كنت مقررة اني ما ادخلش نت و لا أشغل نفسي بأي حاجه غير العبادة بس جه اللي لا على البال و لا على الخاطر مشاكل سمسمة و نمنمة ( اللي كانت نهى كاتبة عنهم في مدونتها قبل كده ) (( دي حقيقة على فكرة ))
و سبحان الله نمنمة دي ربنا مديها لسان ( مش عايزة ادعي كفاياني دعا بئا ) كانت بتقول عني كلام غلط و تحلف للناس يقوم بعض الناس يصدقوا لانهم مش متوقعين انها ممكن تحلف كذب و بعدين ما شاء الله عليها مقنعة اوي يقوموا يكشروا في وشي اقوم اروحلهم و اصلح الكلام
و من كتر ما عملتلي مشاكل بقيت حاسة اني عايزة انسى ( زي اللي بيسكروا بالظبط ) ما بقاش عندي حاجه اعملها في رمضان كله غير 3 حاجات
أصلح الكلام اللي بيتقال عليا غلط و ادعي عليهم و اتحسبن و اني ادخل على الفيس بوك (( يعني بالنسبالي الفيس كان الويسكي و الدعا عليهم المزة ههههههههههه))
و لله الحمد كان عندي ثقة في ربنا جامده ان كل ظالم اخرته وحشه و ان كل مظلوم مع الثقة في الله و الصبر فرحته في الاخر ما تتوصفش و هياخد حقه أكيد
و بعد رمضان ما خلص (( منهم لله ضيعوه على البيت كله مش عليا بس )) و عالعيد بئا وصلنا لمرحلة الهدنة بس قبل الهدنة كانت الجولة و الحمد لله نهايتها لصالحي
ربنا يكمل بقيت الجوالات على خير
دعــــــواتكـــــم

الأحد، 9 أغسطس، 2009

احنا وصلنا

الاسبوع اللي فات محاسن قالتلنا انا و نهى ان فيه تصوير يوم السبت اللي هو امبارح
تصوير ايه يا محاسن؟؟
قالت ده تصوير لقناة دبي و الحرة و برنامج العاشرة مساءا على دريم ده غير مجلة الشباب
ده كله يا بنتي و كمان في يوم واحد
قالت اه ما احنا خلاص و صلنا
اه صحيح ده احنا وصلنا !!
قولتلها يا محاسن قوليلهم اني منقبه علشان لو كان في اي اعتراض..
قالت ما انا قولتلهم و قالوا ماشي موافقين
قولت طيب الحمد لله الدنيا لسه بخير...
المهم من ساعتها طبعا و احنا بنجهز في نفسنا و كلامنا اللي هنقوله
ويوم الجمعه ما جلناش نوم الا بعد الساعه 3 ونص
مش من الفرحه.. بس لاننا مش واخدين على النوم بدري وخصوصا ان محاسن قالت ان الجماعه بتوع العاشرة مساءا جايين الساعه العاشرة صباحا فكان لازم ننام بدري علشان نصحى مش اقل من الثامنة صباحا
المهم صحينا يوم السبت اللي هو امبارح و لبسنا و جهزنا نفسنا واتصلنا على محاسن لقيناها لسه صاحية من النوم ... مش مهم المهم انا احنا فضلنا قاعدين مستنينها لحد الساعه 10 و ربع و هيا لسه في بيتها !
فاتصلت علينا و قالت روحوا انتو علشان انا لسه قدامي شوية
علشان ماطولش عليكوا روحنا انا و نهى واستنينا محاسن واتعرفنا في الوقت ده على كيمو صاحب مدونة صوت من مصر و صاحب برنامج من شوارعنا و كمان اتعرفنا على اسلام صاحب مدونة اصحي يا مصر و صاحب برنامج من قلوبنا وقعدنا مع الجماعه بتوع العاشرة مساءا
ولان محاسن اتاخرت اوي فاضطر المصور انه يصور معايا انا و نهى تصوير سريع و احنا قاعدين على الكمبيوتر حاجه كده زي خلفيه للتقرير
وبعدين محاسن جت و صوروا معاها و صوروا مع نهى و كيمو واسلام وجم عليا انا و قالوا لا علشان دي منقبه...
قولتلهم نعم؟
مش انتي يا محاسن قولتلهم قالت انا قولت لبتوع قناة الحرة و دبي و مجلة الشباب ومكنتش متصورة ان قناة دريم ممكن ترفض
فجت معدت البرنامج _ الانسه بسنت _ و قالت اعتقد ان القناة ماعندهاش مانع و على العموم هنصورها و لو اعترضوا هنحذف الحته دي
راح المصور قايل لا انا مش هصورها و جه و قالي اكشفي وشك و لو في اوضه من الاوض و اصور معاكي علشان محدش من الموجودين يشوفك
قولتله نعم ؟؟؟ محدش من الموجودين يشوفني و بليل مصر كلها تشوفني ؟؟؟؟؟؟ لا طبعا
المهم عاند معايا وصور المجموعه في اكتر من حاجه و رفض انه يصورني معاهم
الأنسه بسنت جت اعتذرتلي و قالتلي معلش اصله مسيحي و مش عارف انه ماينفعش تكشفي وشك
قولتلها و لا يهمك انا ليه صحبات مسيحيين و بحبهم و بيحبوني ومتواصلين مع بعض من ايام الجامعه و الموضوع ده حاجه في دماغه مش مسألة مسيحي او مسلم
ماهو ممكن مسلم يعمل نفس الحركة دي لحاجه في دماغه برده
قالتلي ماتزعليش ...قولتلها مش زعلانه ولا حاجه بس انا مش هغضب ربنا علشان ارضي حد من البشر مهما كان
والتصوير مش مهم
و ربنا يهديه
و في نص كل ده المعد بتاع قناة الحرة و دبي اتصل بمحاسن وقالها ان المصور عمل حادثة و هنحدد معاد تاني
يا دي الحظ ههههههههه


المهم
يا جماعه افتحوا انهارده العاشرة مساءا علشان تشوفوا نهى اختى و محاسن و كيمو و اسلام
كلهم اخواتى و حبايبي

اه نسيت اقولكم ان الاستاذ كريم كمال في مجلة الشباب جه و عمل معانا كلنا لقاء صحفي و صورنا كلنا و بصراحه واضح انه عقليه كويسه جدا و محترم جدا و صحفي شاطر جدا جدا
ربنا يوفقه و يوفق الجميع

الخميس، 6 أغسطس، 2009

مطلقات راديو








الحقوا يا جماعه مطلقات راديو نزل لازم كلكو تسمعوه طبعا مش بيتكلم عن المطلقات بس لا ده فيه مواضيع تنفع لكل الاعمار و كل الناس فيه منوعات كتير وانا بلا فخر مذيعه فيه و برنامجي هو قلوب بنات

ولازم تكتبولنا تعليقاتكو طبعا ليا انا و زمايلي مستنينكم و يا رب يعجبكوا وده اللينك http://motalakatradio.blogspot.com ولو نشرته ل 10 من اصحابك هتسمع خبر حلو هذه الليلة و لو لم تنشرها سوف تسمع خبر سيئ ههههههههههههههههههههههههههههههههههههههههههههههههههههههههههههههههههههههههههههههه ههههههههههههههههههههههههههههههههههههههههههههههههههههههههههههههههههههههههههههههه زي الجماعة بتوع المنشورات مجهولة المصدر

الأربعاء، 29 يوليو، 2009

ضاعت الفسحة وضاع الأمل

ماما امبارح قالتلي ماتشوفيلك خروجه اخرجيها مع صحباتك بدل ما انتي قاعده مخلله كده
قولت في سري انا مخلله طيييب مش هتشوفي وشي انهارده وروحت متصلة على صحباتي ( الاتنين اياهم بتوع البوست اللي فات ) و قولتلهم يلا نخرج ونتفسح انهارده طول اليوم

و احنا ماشيين بلغتهم ارائكم اللي كتبتوها في تعليقاتكم
لقيت كل واحده فيهم بتقول للتانية وانتى ايه اللي تاعبك انا تعبانه اكتر منك وفجاه دارت مناظرة بينهم فيها نوع من النفسنه و الضغينه
فعلشان اعرف احكيلكم اللي حصل من غير ما نلتخبط كلنا هنعتبر ان الاخت اللي لسه ما اتجوزتش هيا رقم 1 و الاخت اللي اتطلقت هيا رقم 2 واسمعوا بئا ايه اللي حصل
رقم 1 قالت انتي أحسن مني على الاقل الناس مش كل شوية يقولولك شدي حيلك ولا عقبالك يا حبيبتي و الكلام اللي وجعين قلبي بيه ده
رقم 2 قالت لا انتي الاحسن على الاقل الناس مش بيعملوا معاكي زيي كل شوية بيبصولي نظرات بتقتلني ده غير الكلام بئا ربنا يعوض عليكي يا حبيبتي و يا ترى مين فيكو الغلطان
ده انتى كمان فرصتك في الجواز احسن لانك لسه بنت بنوت ومافيش حاجه تشغلك لا عيل و لا تيل
راحت 1 قايلالها لالالالالا ده العرسان دلوقتي بيفضلوا المطلقه علشان مش هتطلب مهر كبير و عندها شقة و عفش كمان و العرسان غلابة اليومين دول و العيل اللي بتقولي انه شاغلك ده كفاية انه مسليكي و مالي عليكي حياتك حتى لو ما اتجوزتيش تاني هو كفاية في حياتك
راحت 2 قايلة مسليني ايه ده مطلع عيني و ماسك في ديلي رايح جاي ده حتى انتي بتعرفي تخرجي و تروحي و تيجي براحتك مش ملزومة من حد وماماتك و باباكي بيسيبوكي تخرجي براحتك في اي مكان و اي وقت يمكن تعرفي تتكعبلي في عريس و انتي ماشية انما انا اهلي دايما معارضين خروجي علشان سمعتي كمطلقه
قامت 1 قايلة ده انا لما بروح لواحده متجوزة و هيا صغيرة و ولدت اجي اشيل الطفل الاقي امه زي اللي خايفة عليه مني لأحسده و تقولي عقبال ما تشيلي يا حبيبتي ونظراتها مابتبقاش مريحة يبئا انتى احسن ولا لا على الاقل خلفتي والناس مش هيخافوا على عيالهم منك
راحت 2 قايلة انا بئا لما بزور واحده متجوزة مش بتخاف على عيالها مني بتخاف على جوزها مني يبئا انتي احسن ولا لأ

و فجأة راحو الاتنين بصين لبعض و بصين ليا نظرة ريا و سكينه ....... انا خوفت اوي و روحت بصالهم نظرة حسب الله... قصدي نظرة الضحية
فجاه قامو معيطين بداوا في عزف سيمفونية البكاء الشهيرة
طبطبت عليهم ووصلت كل واحده بيتها

وانا في طريقي للبيت فكرت في حاجتين مهمين جدا

اولا- معظم الشكاوي اللي اشتكوها سببها نظرة المجتمع للعانس و المطلقه رغم انهم مالهمش ايد في حالهم ده لان كل شيء قسمة و نصيب ودول نصيبهم كده
يا ترى ايه الحل اللي ممكن نقدمه للناس اللي بيعانوا من المشكلتين دول
و ازاي نغير نظرة الناس ليهم


ثانيا- لما اروح البيت هقولهم ايه اللي جابني بدري كده و روحت فين
وشي منك في الارض يا مامي


وضاعت الفسحة يا ولدي .. قصدي يا أمي
كفاية بئا قبل ما اعزفلكو السيمفونية اللي سمعتها

الأحد، 19 يوليو، 2009

مش عايزة اعنس مش عايزة اتطلق

يا جماعة انا قربت اتعقد
مش بقلكو كده علشان تتعقدوا وخصوصا البنات لأ
انا بقلكوا كده علشان تلحقو تفكوا العقده قبل ما تبئا عقده وشنيطة
انا ليا واحدة صاحبتي وصلت لل30 ولسه ماتجوزتش مع انها بيجيلها عرسان كتيييرومنهم ناس ماتترفضش
ولما سألتها مابتوفقيش ليه بنتي دول شباب زي الورد و طبعا كل شيئ قسمة ونصيب قالتلي اجابة غريبه اوي
قالتلي اصل انا مش عايزه أتطلق!!!!!
ازاي يا بنتي
قالتلي اصل انا ليا صفات عايزاها بالمللي في الشكل و المضمون والحاله المادية و الوظيفه و العيلة وخايفة اتنازل عن صفة فيهم تكون السبب في طلاقي
بس المشكلة ان معظم شباب اليومين دول مابيتجمعش فيهم كل الصفات دي يعني لو لقيتي عريس فيه كم صفة حلوة قصادها على الاقل هتلاقي صفة او صفتين وحشين وكامل الاوصاف ده تقريبا مش موجود
قالتلي خلاص أبئا أعنس احسن
؟؟؟؟؟؟؟؟؟؟؟

واعرف صاحبة تانية اتجوزت في سن صغير و كانت جوازة و خلاص و دلوقتي مش مرتاحه مع جوزها والموضوع قرب يوصل للمحاكم
ولما سألتها ليه يا بنتي عملتي في نفسك كده واهو كله طبعا قسمة و نصيب بس مش كنتي تصبري شوية يمكن كنتي تلاقي الشخص اللي صفاتك ماشية مع صفاته
قالتلي لأ خوفت أقعد كتير ومالاقيهوش لأ انا مش عايزه أعنس !!!

يا ترى ايه الصح ؟؟ رأي الاولى ولا التانية

دلوقتي بئا..... من هنا ومن هذا المزنق احب اقولكم انا مش عايزة اعنس ومش عايزة اتطلق

ماذا تفعل لو كنت مكاني ومكان اي واحده من البنات اللي لسه في العشرينات ؟؟






الجمعة، 17 يوليو، 2009

انا هنا جديدة معاكو

نبدأها بالسلام عليكم و رحمة الله و بركاته

انا هنا جديدة معاكو ويا رب تقبلوني واحدة منكم ويا رب اكون خفيفة عليكم و مايبقاش دمي تقيل

و يا ريت تشرفوني بزيارتكم دايما وتشرفوني أكتر بكتابة تعليقاتكم علشان أحس ان فيه تواصل و محسش اني بكلم نفسي

ومتشكرة جدا ليكو