السبت، 26 ديسمبر، 2009

كل سنة و انتم طيبين و مع مطلقات راديو ان شاء الله مبسوطين

حبايبي الحلوين كل سنة و انتو طيبين و على طول متجمعين و دايما محبوبين و للسما مرفوعين
(( مع تحياتي ماما دعاء مش ماما فضيلة ))
بجد كل سنة و انتو كلكوا طيبين و بخير دايما يا رب و السنة الجاية تكونوا كلكوا محققين اغلب امانيكم و طموحاتكم

طبعا لكل المتابعين انا سيبت المدونة فترة طويلة و ده كان بسبب شوية مشاكل على شوية مشغوليات اللي كانوا مخليني شبه الدميه اللي بتتحرك بس ماهياش عارفه رايحه فين ولا جاية منين (( بس و الحمد لله وقف جنبي ناس كتير بعد ربنا طبعاً و بجد هما دوا اصدقائي الحقيقين على راسهم طبعا محاسن سنسن حبيبتي و منامينو و شيكو الضد و حنين ( همس الاحساس ) بشكرهم كلهم جدا و بقولهم ربنا يخليكوا ليا و ما يحرمنيش منكم ولا يحرمكم من الصداع اللي بعملهولكوا كل شوية )) و بشكر كل اللي تابعونى و كانوا بيعلقوا عندي و بيسألوا عليا (( ربنا يخليكم ليا يااااااااا رب ))


اه و كمان كان فيه شوية فرسه بسبب انى كل ما اكتب مع نفسي موضوع تطلعلي واحده (( هيا عارفه نفسها مش اي واحده ها )) و تقولي (( انتى بتعملي ايه ؟؟؟؟ انتى كده هتحرقي مواضيع برنامجك في الراديو !!!!! )) اقوم قافله الكراسة بتاعتي و اقعد حاطة ايدي على خدي (( لحد ما خدي اتعوج من حطة ايدي عليه ))


المهم ما اطولش عليكم (( قولوا طولي )) سيبت المدونة بس برده كنت بشقر عليها من وقت للتاني و كنت بتابع بعض مواضيعكم (( مش كلها علشان بس قلة فضى مع مخ مشغول بالمشاكل بس و الله كانت مواضيكم كلها بتعجبني ))

وساعات كنت بقرا بعض بوستات قهرا كده لما حد من اصحابي و صحباتي يقولي خدي اقري الموضوع ده (( منتهى القهر اللي في الدنيا )) (( بهزر طبعا ده كلهم حلوين و مقطقطين )) بس و الله كنت ببئا مبسوطة اوي و كمان بوستاتهم كانت بتخرجني من الجو اللي كنت عايشاه فكانت بتعملي انتعاشه


و اخيراً الحمد لله اخيرا و ليس اخراً مطلقات راديو هينزل و هعرف اكتب بئا في مدونتى حبيبتي براحتي من غير ما حد يزعقلي و هقول كل اللي نفسي فيه (( احمدك يااااااااا رب ))

المهم بئا ركزوا اوي في الحته اللي جايه دي

افتتاح مطلقات راديو قرب يا جدعاااااااااااااااااااااااااااااااااااااااااااااااااااااان
مش بس كده ده هيكون يوم 1/1/2010 الساعه 6 مساءا على الهواء مباشرة زي متشات الكورة

عارفين يعني ايه افتتاح الراديو يوم 1/1/2010 يعني عندي حاجات كتييييير اوي اوي اهمهم بئا انى هروح اشوف اصحابي اللي بجد ، و كمان علشان اخيرا هنفتتح مطلقات راديو (( تعب الشهور هايجي بفايده )) ، و كمان علشان عيد ميلادي (( صحيح انا زعلانه لاني كبرت و تمت الربع قرن - هو مش 25 سنة ربع قرن برده - اه اصلي خايبة موت في الحساب - بس مبسوطة برده لانه عيد ميلادي ))

المهم بئا يا ريت يا ريت يا ريت كلكم تتابعونا و تقولولنا رايكم و تشاركونا الفرحه و مستنينكم استنونااااااااااااااااا




هناك 12 تعليقًا:

Sweet Violet يقول...

كل سنه و انت طيبة بقى
و مبروووك مقدما على الراديو لحد ماينزل يعنى
^_^
و مبروك على البوست الجديد فى المدونة
ايوة ماهى مهجورة يبقى الواحد لما يشوف فيها بوست لازم يفرح فرحة العيد ياامى
على فكرة وحشاااانى مووووت
هه بس
-_-

شمس النهار يقول...

كل سنه وانتي طيبه مقدما قبل يوم 1/1

وكل سنه وانتي طيبه علي راس السنه
بسسسسسس

موضوع الراديو ده اشك خاااااااااالص

في موعد الافتتاح

انا اتعقدت خلالالالالالالاص :(


سلامي

blue-wave يقول...

كل سنه وانتى بالف خير

dodoo يقول...

شيكو

وحشتيني موووووووووت فينك ما بقتش اشوفك ليه
و انتى طيبة يا حبيبتى و الله يبارك فيكي يا قمر و انتى معانا طبعا

وحشتينى و لازم اشوفك يعني لازم اشوفك هه بس

dodoo يقول...
أزال المؤلف هذا التعليق.
dodoo يقول...

شمس النهار

ميرسيه خااااالص لحضرتك و حضرتك طيبة و بالف خير

و بالنسبة للراديو انا عارفه ان احنا كلنا اتعقدنا و الله بس اهو املنا في ربنا كبير
ولولا انه محاسن حجزت فعلا الاستديو ما كنتش جيبت سيرته خالص علشان الفضايح
هههههههههههههه

و متشكرة جدا لحضرتك و نورتي البلوجر كله

dodoo يقول...

blue-wave

ميرسيه جدا على تشريف حضرتك لمدونتي المتواضعه جدا
و كل سنة و حضرتك طيب و بالف خير

mahasen saber يقول...

كل سنه والحلويين الطيبين الليى طيابتهم هتوديهم ورا البحر الاحمر
كل سنه وهما بكل خير

واه الافتتاح قرب قرب قرب يا جدعان تخيلى اخيرا حصل وانا كنت فاكره انه محصلش لسه

دعواتك بئا ربنا ييسرلنا الامور وتتم على كل خير

mahasen saber يقول...

وبعدين قلنا اكتبى الاسم صح عيب عليكى ده الموضوع اتولد على ايدك يا ظالمه
يا حاجه انتى

dodoo يقول...

محاسن حبيبة قلبي

و الله تصدقي ورا البحر الاحمر حلو برده اهو عند الجماعه الخلايجه و البترول و كده
هههههههههههههههههههههههههههه

و بالنسبة للراديو ياااااااااا رب يتتممله على خير و ينتعه بالسلامة و يجعلها ساعه سهله عليه و علينا و من ناحيتي هعجل بالمغات و السبوع
هههههههههههههههههههههههههههه

و عنوان ايه اللي يتصلح يا حجه ما هو مظبوط اهو مطلقات راديو قد الدنيا اهيه

أم .. بوبه يقول...

ربنا يتمملك مشاريعك كلها على خير إن شاء الله من غير عكوسات

dodoo يقول...

ام بوبه
ميرسيه يا قمر ربنا يكرمك و يعزك