الخميس، 24 سبتمبر، 2009

كل سنة و انتو طيبين /// انا و الفيس بوك و سمسمة و نمنمة

كل سنة و انتو طيبين وحشتوني بجد
انا اسفه انشغلت عن المدونة و اهملتها و مابقتش حتى برد ولا بعلق بس و الله كان غصب عني
كان عندي مشاكل في الشغل كانت متلوهاني على الاخر رغم اني مغلطتش في حد و مكنتش مركزة في اي حاجه علشان اكتبها ولا حتى مركزة في اي حاجه بقراها
بس هو الغلبان كده مالوش عيش في الدنيا
و على فكرة انا لسه مهيسة من اثار المشاكل بس انتوا وحشتوني فقولت ارجعلكم بأي موضوع المهم اني ارجع وسط الناس اللي بعزها و بحبها بجد من قلبي من تاني
المهم متشكرة جدا لكل الي سأل عليا و عيد عليا و خصوصا اختي ( تأثير الفراشة )و محاسن ( انا عايزة اتطلق )

ـــــــــــــــــــــــ.......ـــــــــــــــــــــ
انا و الفيس بوك و سمسمة و نمنمة

من يجي سنة نهى اختي عملتلي اكونت على الفيس بوك و قالتلي تعالي و اشتغلي عليه و اتعلميه و كل مرة اقولها ابعدي عني فيس بوك ايه انا دماغي مش في كده خالص
و لما قابلت يوم تصوير العاشرة مساءا اسلام جاويش ( اصحي يا مصر ) و محمد كمال ( صوت من مصر) قالولي انتي لازم تدخلي الفيس بوك و تتعلميه بصراحة حمسوني و قولت ابئا أتعلم من نهى ازاي اعرف اتعلم عليه (( عيب اوي الاصغر مني ما شاء الله عارفين كل حاجه و انا قاعدة زي خيبتها )) و اتعلمته على بسيط و سيبته تاني كم يوم
و فجأة بدأ رمضان و بدأت مشاكل الشغل و رغم اني كنت مقررة اني ما ادخلش نت و لا أشغل نفسي بأي حاجه غير العبادة بس جه اللي لا على البال و لا على الخاطر مشاكل سمسمة و نمنمة ( اللي كانت نهى كاتبة عنهم في مدونتها قبل كده ) (( دي حقيقة على فكرة ))
و سبحان الله نمنمة دي ربنا مديها لسان ( مش عايزة ادعي كفاياني دعا بئا ) كانت بتقول عني كلام غلط و تحلف للناس يقوم بعض الناس يصدقوا لانهم مش متوقعين انها ممكن تحلف كذب و بعدين ما شاء الله عليها مقنعة اوي يقوموا يكشروا في وشي اقوم اروحلهم و اصلح الكلام
و من كتر ما عملتلي مشاكل بقيت حاسة اني عايزة انسى ( زي اللي بيسكروا بالظبط ) ما بقاش عندي حاجه اعملها في رمضان كله غير 3 حاجات
أصلح الكلام اللي بيتقال عليا غلط و ادعي عليهم و اتحسبن و اني ادخل على الفيس بوك (( يعني بالنسبالي الفيس كان الويسكي و الدعا عليهم المزة ههههههههههه))
و لله الحمد كان عندي ثقة في ربنا جامده ان كل ظالم اخرته وحشه و ان كل مظلوم مع الثقة في الله و الصبر فرحته في الاخر ما تتوصفش و هياخد حقه أكيد
و بعد رمضان ما خلص (( منهم لله ضيعوه على البيت كله مش عليا بس )) و عالعيد بئا وصلنا لمرحلة الهدنة بس قبل الهدنة كانت الجولة و الحمد لله نهايتها لصالحي
ربنا يكمل بقيت الجوالات على خير
دعــــــواتكـــــم

هناك 15 تعليقًا:

mahasen saber يقول...

والنبى يا دودو هسهس وبسبس دول جابولى الضغط وشلونى يا اختى يعنى مش انتى بس يا دعاء اليى اتنقطتى

اليى ينقط ان البشاعات دى متتعملش الا فيكوا انتوا

انا لو معرفكوش كويس كنت قلت اه صح انما والله انا مشفتش حد فى اخلاقكوا ولاا تربيتكوا

بس برضه ربنا نصرك ولسه هينصركوا كمان
بس نسيبها للمولى عز وجل

mahasen saber يقول...

ان شاء الله الموضوع ده هينتهى على كل خير

لانه بدأ على لا شئ اصلا
واى ظلم ليه نهايه


ربنا يصلح الحال ان شاء الله

Sweet Violet يقول...

الحمدلله ان اول جوله جت لصالحك و الحمدلله ان ربنا ظهر الحق و نصرك على الظالم
و ان شاء الله الموضوع ينتهى على خير مدام لسه مستمر المهم بس انتى مش تضايقى نفسك
^_^

mohamed ghalia يقول...

كل سنة وحضرتك بخير
ربنا يسعدك دايما

dodoo يقول...

اختي و حبيبتي محاسن
ميرسيه ليكي يا قمر و ربنا يعدي الموضوع على خير
و الجولة التانية بدأت من النهاردة ادعيلي

dodoo يقول...

اختي و حبيبتي محاسن
ميرسيه ليكي يا قمر و ربنا يعدي الموضوع على خير
و الجولة التانية بدأت من النهاردة ادعيلي

dodoo يقول...

sweet violet
ميرسيه جدا يا قمر
و ربنا ينهي الموضوع ده على خير دعواتكم

dodoo يقول...

محمد غالية
ميرسيه جدا ليك و كل سنة و انت طيب و بالف خير يا رب

holaman1968 يقول...

اشكرك للمرور والتعليق
ارجو نكون اصدقاء
مدونتك اسمها غريب
بس واضح انك مخضرمة فى التدوين
نرجو ان نحذو حذوك
اشكرك مرة تانية

شقيقة القلب يقول...

ربنا ينصرك ويصرف عنك السوء

شمس النهار يقول...

ازيك يادودووووو
جايه اسلم عليكي
الاقي عندك مشكله برضه وعلي النت

طيب

انا مبسوطه جدا اني شفتك قصدي سمعتك
:)

ولو اني ماعرفتش اقعد معاكي كما ينبغي
لكن لينا لقاء اخر ان شاء الله تعالي

سلامي

dodoo يقول...

شقيقة القلب

ميرسيه جدا ليكي و ربنا يعزك و الحمد لله حصل فعلا النصر من ربنا سبحانه و تعالى

dodoo يقول...

شمس النهار

بجد ما تتصوريش زيارت حضرتك لمدونتي فرحني اد ايه و الله بجد سعيده جدا
و انا كمان زعلانه انى معرفتش اقعد مع حضرتك وقت كفايه بس ان شاء الله تتعوض يوم الافتتاح
و بالنسبة للمشكلة اتحلت خالص و الحمد لله
و بجد متشكرة جدا جدا جدااااااااا لزيارة حضرتك دي بجد غالية عندي اوي اوي اوي

dodoo يقول...

شمس النهار

بجد ما تتصوريش زيارت حضرتك لمدونتي فرحني اد ايه و الله بجد سعيده جدا
و انا كمان زعلانه انى معرفتش اقعد مع حضرتك وقت كفايه بس ان شاء الله تتعوض يوم الافتتاح
و بالنسبة للمشكلة اتحلت خالص و الحمد لله
و بجد متشكرة جدا جدا جدااااااااا لزيارة حضرتك دي بجد غالية عندي اوي اوي اوي

7annen يقول...

دودووووووووووووووووووو

النت جه وانا جييييت
اهلا بيكى مره تانى منوره التدوين ياقمر

وعيييييب مفيش بنا شكر

انتى اختى حبيبتى يا دودو

اموووووووووووووووووووه