الجمعة، 31 ديسمبر، 2010

هجبلك عادل امام

بما انى من مواليد راس السنه
فبعتبر نفسي محظوظه
مش لحاجه غير لاني من اواخر شهر 12 و كل ما تيجي اعلانات عن راس السنه و كل اللي حواليا يقولولي كل سنه و انتى طيبه
يعني بتتقالي كتير و بحس ان كل يوم عيد ميلادي من نص شهر 12 لحد 1\1
مش بس كده
ده كمان علشان و انا صغيره بابا كان بيقنعني انه اتفق مع عادل امام يجيب الفيلم بتاعه في ليلة عيد ميلادي (( ده على اساس ان زمان كان لازم تلاقي فيلم كوميدي لعادل امام في واحده على الاقل من القنوات المصرية ))
و لو عادل امام ما جاش يبئا هو اتصل ب بابا و قالوا انا مش فاضي و هبعتلك فلان انهارده بدل مني
لحد سن سبع سنين تقريبا كنت ببئا مش مصدقة اوي بس مش هكدب بابا يعني بس بحس ان الموضوع فيه ان اكيد :)
بعد كده بئا بدات اركز و اقول اشمعنى بابا مابيعرفشي عادل امام الا ليلة راس السنه ؟؟؟ ده اكيد الجماعه دول بيضحكوا عليا اكمني هبله و بصدق اي حاجه
(( طول عمري لحد انهارده على فكرة ))
بس قلة الحظ كانت بتبان في حاجه واحده
انى دايما دايما عيد ميلادي في نص الامتحانات
فمبعرفشي استمتع بيه اكتر زي ما بتمنى
و كنت ساعات بنام بدري طبعا علشان المذاكرة
و طبعا بابا كان بيفضل الصبح يذلني و يقولي
(( انا اتفقلك مع عادل امام و مع ممثلين كتير و انتى رايحة تنامي
زي الجردل ))
ربنا يسامحك يا والدي :)))))))
و ما خلصتش من المشكلة دي الا بعد ما تميت 21 سنه لما خلصت الجامعة
ربنا يسامح كل من له يد في الموضوع ده بئا هههههههههههه
المهم يا جماعه
انتو كلكم معزومين انهارده على فيلم عادل امام اللي انا كلمتهولكم علشان يجيب فيلمه انهارده
:D:D:D
نسيت اقولكم ان احلى عيد ميلاد قضيته في حياتي كان مع دخول الالفية الثالثة
الجماعة في التليفزيون كان عاملين معايا واجب نااااااااااار
و في كل بلاد العالم كمان
هههههههههههههههههههههههههههه

السبت، 11 ديسمبر، 2010

عشت حلم انى عشت حلم

عشت حلم انى عشت حلم
ايوة كان حلم قديم اوي عندي
انى اروح اخد و لو كورس واحد على ايد الاسطورة
الدكتور ابراهيم الفقي
و بعد طول انتظار اكتر من سنتين صبر و امل
ايوة صبر و امل
ماهو كل ما احاول اروح احضر بابا يقولي
" لازم حد يروح يحضر معاكي ماينفعشي تسافري و تقعدي لوحدك و ترجعي لوحدك "
لحد ما كرهت انى مش من اهل القاهرة
و رغم انى كنت دايما ببحث كتير عن اي حاجه من ريحة الدكتور الفقي
قريبه منى
الا انى اتفاجئت مرتين انه هو بنفسه جه الزقازيق في الجامعة من سنتين
و انا معرفشي !!!!!!
اه .. ما انا عارفه النحس لما بيركبني
طيب ماهو ماكنشي في اعلانات للموضوع ده !!!!!!!!
و لو كان في اعلان واحد كنت هعرف ده الزقازيق كلها اوضه و صالة
ما تتوهشي يعني
بس الحمد لله و لاول مرة
قدرت اخيرا اقنع اختى ان التنمية حلوة :)
و اخيرا اقتنعت بعد طول انتظار و وافقت
هييييييييييييييييييييه ياهوووووووووووو
و روحت حضرت كورس رائع عن الذاكرة و التذكر للدكتور ابراهيم الفقي
و كان معاه كمان كورس ادارة الوقت للاستاذ احمد قدوس كان جامد جدا برده
و استمتعنا جدا انا و اختى و هيا كمان خدتلها كم صورة على كم فيديو
هتلاقوهم موجودين على صفحة حملة نور عالفيس بوك
المشكله بئا كانت فيا انا .....
على اد ما استمتعت على اد ما كنت قاعدة متنحه
ايوة و الله متنحة ... يمكن من الفرحة ... يمكن علشان مش مصدقه انى حققت خطوة كنت هموت عليها من زمان !!!!!
مش عارفه ؟؟؟؟
بس اللي كنت متاكده منه
انى كنت بحلم و انا بعيش الحلم

الاثنين، 29 نوفمبر، 2010

نور هيا حياتي



وحشتوني كلكم خالص خاااااااااااااااالص

و الحمد لله كرم و نعمة كبيره انى بشوف معظمكم عالفيس بوك

و زعلانه انى مش بشوف الباقي كتير

بجد عايزة اعرفكم كلكم عالفيس علشان نتواصل اكتر
................................................
هتكلم من جوايا اوي من غير ما ارتب و لا انسق
بقالي سنين حلمي و طموحي انى اتعمق في علم التنمية البشرية و اكبر و اكبر كل اللي حواليا
و الموضوع ده ماسبشي دماغي طول الفترة دي
رغم انى اشتغلت حاجات تانيه بس عمر التنمية البشريه ما طلعت من دماغي
و كنت دايما متابعه تطوراتها و جديدها و محاضراتها و كورساتها
رغم انى ماعرفتش احضر و لا محاضرة و لا كورس لانهم كلهم في القاهرة بس
و بابا زي اي اب شرقي جميل بيحافظ على بناته
كان دايما يرفض انى اروح لوحدي
طيب انا اعمل ايه ماهو ماحدش حواليا فاهمني و مهتم زيي علشان يسافر معايا و يحضر بالخمس ساعات و كمان يدفع فلوس و هو اصلا مش في دماغه ؟؟؟؟
اتمسكت بحلمي و قولت يا رب
و ربنا من كرمه الشديد عليا كان معايا و قدرت انى اعمل حاجه كانت غايبه عني بس ربنا نورهالي
حملات تنظيم كورسات و محاضرات التنميه البشريه
و دي بتكون في المحافظات و بتتوسع بعد كده
زي حملة اي دريم في المنصورة و حملة ابني نفسك في الاسكندرية و غيرهم كتير من الحملات الناجحه جدا
فربنا بئا بعتلي فكرة
اعمل انا كمان حملة و انظم كل حاجه فيها و اجيب كل المدربين اللي مش عارفه احضرلهم هناك عندي هنا ...
و يمكن ربنا يكرمنى و اعرف اتوسع زيهم و اعمل حملة ناجحه انا كمان و احقق حلمي
و من هنا طلعت فكرة
حملة نور للتنمية البشرية
حملتي .. تأسيسي ... حلمي .... حياتي
عايزاكم كلكم بئا تدعولي اوي اوي
و تقفوا جنبي و تدعموني في لو عدت عليا لحظات ياس او احباط
بحبكم كلكم جدااااااااااا و بحب كمان نور .....

الاثنين، 11 أكتوبر، 2010

زي اي بنت

زي اي بنت
بتحلم بيوم فرحها
لما تلبس فستانها ابيض
اللي بنفسها اختارته و زوقته
و اتزوقت هيا كمان
علشان تكون في عينه احلى من اي ورده في بستان
و في عنيها هيا كمان
اصلها عايزة تنسى نفسها زمان
ايام الهم و الكرب و التوهان
من عريس لعريس
و من كلام ناس لكلام .....
و قلبها دق و قرب يخبطت عالببان
لما جالها و لابس بدلته اللي اختارتها معاه
و قالها يلا يا قمرايتي على جنتنا
و قبلها هنروح نشوف عيون الناس
و هما بيشوفوا احلى عرسان
و راحت معاه و هيا رجليها مش واصله الارض من الفرحة
و فنفس الوقت ركبها بتطبق زي الورق
و من ده مبروك و من ده مبروك نسيت خوفها و كملت طيران
و قبل الفرح
كانت عايشه حالة حب
و متطمنة و هيا بتحب
و مش خايفه من حاجه
ايوة ماهو خطيبها
اللي جه بيتها
و اتكلم مع باباها و مامتها
و عجبته و عجبها
و جاب اهله
و قالهم انا عاوز دي
و مش هتجوز الا دي
و لما باباه قال مش جايب كذا
هو قال انا هجيب
و هشد حيلي في شغلي و اجيب
اللي ملت عنيا و قلبي تستاهل ملو الجيب
و جابلها دهب رغم انه قليل
بس كان في عنيهم هما الاتنين ماس كتير
و قالها لازم البسهولك بنفسي
وشها احمر و قالتله لا اتكسف و حرام
قالها هلبسهولك و يا قاتل يا مقتول
وشها زاد حمار
كسوف و فرحة و حب رعش قلبها
و جابلها هدية و قالها
نفسي اجيبلك كل الدنيا أو اخدك اوديكي للدنيا
بصيتله و عنيها بتلمع
و فسرها قالت انا معاك مالكة الدنيا
ماتسيبنيش لتضيع كل حياتي
انا بعدك ماليش مكان فيها
الدنيا دنيا و انا معاك
و نظرة عنيك تحرر اوطان
ازاي ماشافوهاش قبل الحروب و الخناقات
كانوا حبوا بعض و طلبوا الغفران
قالها هجيبلك كل الدنيا
اوعى تستغلي حاجه و ماتجيبيهاش
بصيتله في كسوف و قالتله في سرها
انت عندي كل الدنيا
و انت اغلى عندي من اي حاجه
كفايه حبك ده يدوم
و انا ضامنه نفسي حبي دايم

الاثنين، 4 أكتوبر، 2010

هنا .. ايوة الله هنا

عايز تعيش في هنا ؟؟؟
حاسس انك متضطهد و كل الناس بتبصلك من فوق لتحت ؟؟؟
حاسس انك مش عارف تعيش في حياتك ؟؟
حاسس ان كل حاجه متقفله في حياتك و الطرق كلها مسدوده ؟؟؟
نفسك تعيش حياه من غير مشاكل ؟؟؟
.
.
يبئاااااا لااااااازم تدددددددددددفع
ايوة تدفع مستغرب ليه !!!!
ايه مش معاك ؟؟؟
مش مهم اقل حاجه تكفي
قلم جاف شيك .. شيكولاته جالكسي مثلا ... كانز ... بالكتير ممكن علبه بسكوت بالجمله
خلينا في علبة البسكوت علشان تعنيلي شيء معين
تخيل انت بئا لما تكون متضطهد في شغلك و مش عارف ليه رغم التزامك الشديد
لدرجة انك بيعدي عليك ايام كتير بتنسى نفسك في الشغل و تطلع اخر واحد من الشغل
و رغم كده تلاقي حتى موظف الامضا اللي اسفه في التعبير ( اقل منك في المستوى التعليمي و البيئي ) و الله ما قصدي تكبر لان كلنا رزقنا متقسم عند ربنا
بس المفروض يكون في اعتناء شويه بالموضوع ده على الاقل مش لازم التكشيره في الوش و الاحترام ده اقل طلب اي حد بيطلبه في المعامله
المهم ان موظف الامضا يستناك لما تقرب عليه يقوم جري ماسك القلم الاحمر و مشطب عليك و بعد ما تمشي زعلان و دمك محروق يسيب القلم الاحمر و يمضي اللي يجي بعدك !!!!! علشان يكملك حرقة دمك و مهما اشتكيت هتطلع انت اللي غلطان
لدرجة ان اللي يدخل معاك في نفس الوقت لمكتب الامضا تبئا امه داعيه عليه !!!!!!
و مش هو بس لا ... قيس المعامله دي مع كل ما ضمن انك محتاجه او هتحتاجه في يوم من الايام و لو كنت محتاج حاجه من حقك يعنى مش حد هيتعطف عليك ... ده مجرد حقك الوظيفي
و تكتشف في الاخر انك تستاهل علشان غبييييييييييييييييييي ايوة غبي
كلهم حاولوا معاك كتير انك تديهم رشوة و انت مش فاهم ؟؟؟؟؟
حسن نيه او رفض للمبدئ ... في كل الحالات انت في نظرهم تستاهل اللي يجرالك ....
و اول بئا ما تكتشف انك غبي و تفكر تكون زكي تتفاجئ ان الكل كان مستنيك من زماااااااااااان علشان كده اتجمعوا عليك و قرروا يعقلوك و يرشدوك للطريق الصح اياً كانت الطريقه .....
و بعلبتين بسكوت بالجمله الواحده منهم ب6 جنيه بس ( ستة جنيهات فقط لا غير ) !!!!!
صدقنى ممكن تعيش حياه هنا هنا هنا
بس خلي بالك .......
اوعى كل مرة تكرر نفس الحاجه ليزهقوا منك
يعني مرة بسكوت و مرة مقلمة فيها قلام شيك و مسطرة و استيكة و تقوله دي لابنك او مج شيك و تقوله خد اشرب في ده شاي ....
و اي حاجه بئا من هذا القبيل ........
لان فعلا اللي بيبص للرشوة مابيهموش قيمة الشيء اللي هيرتشي بيه ........
و انت مضطر علشان تعرف تاخد اقل حقوقك
و لا عزاء للمبادئ .....
و حسبنا الله و نعم الوكيل

الجمعة، 17 سبتمبر، 2010

عمرك ما هتفلحي يا بلد طول ما ده تفكير شعبك

شعب بجد غريب ...
بيندب حظه و يلعن بخته على قلة النجاحات في بلده و اللي ينجح و لا حتى يحاول يهده ....
تفتكروا بالشكل ده ممكن يبئا في نجاح في البلد دي بالشكل ده ...
رجاله و ستات بيهدوا نجاح اي حد يطلع بينهم من غير ما يحسوا او يمكن حاسين و بيستهبلوا مش عارفه
طيب و بعدين !!!!!!
شباب ينجحوا .... يقولوا بكرة يتهد لوحده لما يتصدم بواقع بلده .... طيب ما تحاول تساعدوا !!!!
مش يمكن تنجحوا سوا او على الاقل تكون كسبت ثواب انك ساعدت حد علشان ينجح !!!!!
حتى البنات (( و خلينا في البنات دلوقتى علشان ده مشاكلهم لافته نظر ناس كتير ان ما كانوش كلهم بالايجاب او بالسلب ))
كله بيفكر في فلانه اولا سنها كم و يبدا يحدد هيا دخلت في اي شريحه و يتعامل معاها على الاساس ده حتى لو ما يعرفهاش !!!!
حتى لو كانت ناجحه او بتسعى في طريقها للنجاح (( ده ما يهمهومش في حاجه خالص ))
المهم اتجوزت و لا لسه و لو ما اتجوزتشي يبئا اكيد اكيد مابيجيش عرسان و لا عمرها شافتهم يا اما بئا العيب منها ...
ما حدش بيقول لا و الله يمكن عايزة واحد يساعدها على النجاح او حتى على الاقل على الاقل يساعدها في تكوين اسرة سعيده و مرتاحه نفسياً .. مش اسرة تبدا حياتها بالخناق او الزعيق او حتى حرقة الدم و القهر ...
(( و ما شاء الله عرسان الايام دي غريبه بكل المقاييس و خصوصاً اللي بيجوا للبنات المحترمات اللي قاعدين في بيوتهم و ما بيخرجوش يلقطوا عرسان من الشارع او من الكلية او من الشغل او غيره ... من الاخر اللي بيحترموا نفسهم و اهلهم و ماشيين جنب الحيط )) (( مع قلتهم للاسف بس موجودين و منتشرين بس مختفيين عن الاعين علشان قاعدين في بيوتهم ))
البنت من دول لما بتفكر في نجاح بتتقسم عند الناس لمراحل :-
1- ايام الكلية و بعدها بسنه تقريبا .... و دي بيقولوا عليها ما شاء الله عندها فكر و ناجحه بس بكرة تتجوز و تنسى كل ده .
2- بعد الكلية بسنتين لحد منتصف العشرينات .... بيقولوا برده مسيرها للجواز راحت و لا جت .
3- من منتصف العشرينات لحد قبل التلاتين بسنه او اتنين ..... نجاح ايه و بتاع ايه ما تروح تشوفلها راجل يتجوزها و يستترها .
4- اواخر العشرينات لحد الثلاثين .... ده قصر ديل ما هيا لو كانت لقت عريس و لا حتى دخل بيتهم عريس كانت مسكت في رقابته و نسيت اللي هيا بتعمله ده .
5- بعد التلاتين .... يااااا حراااااام خلاص بئا ما بقاش ينفع . سيبوها تشغل روحها في حاجه بدل ما تطق من التفكير و الوحده (( و هيا ممكن ما يبئاش في دماغها اصلاً ... بس طول ما هما عايزين كده يبئا مش هتعرف تقنعهم فتسكت احسن )) .
6- لو كانت اتجوزت و ماخلفتشي ... برده نفس الكلام مع تغيير كلمة عريس يتجوزها بكلمة عيل يملى عليها البيت
تفتكروا بئا ممكن مجتمع يشوف النجاح و التطور و الرقي في وسط كل بلاد العالم طول ما هو شايف ان الجواز و الخلفه هما اكبر نجاح في الكون ؟؟؟؟؟؟؟؟؟؟
سمعت مرة حلقه للشيح عطية مبروك و جاب سيرة الموضوع ده لما وقع في ايده جواب من اكتر من عشرين او تلاتين سنه من بنت عايشه في بلد بره مصر و باعته جواب لشيخ الازهر بتطلب فيه انهم يسمحولها بالحضور للتعلم في الازهر بعد ما درست حاجات كتير و اشتركت في نشاطات كتير و كاتبه في الجواب السي في بتاعها و الملفت للنظر انها سنها فوق الثلاثين و في اخر الجواب ( امضاء الانسة فلانه )
و ساعتها الشيخ قال فعلا هو ده الصح و ده سبب رقي البلاد .. انهم بيطلقوا شبابهم و بناتهم و رجالهم و نسائهم حتى الاطفال للنجاح و وقت ما الجواز يجي يجي و برده مش معنى كده انه يكون نهاية النجاح .
امتى الشعب ده هيفهم النظريات دي و هيعرف يحل مشاكله و يحط ايده على الحلول بدل ما هو قاعد حاطط ايده على خده و مستنى عقد عمل بره في البلاد الناجحه حتى لو كان عقد عمل لعامل كنس شارع او غسيل صحون (( ما تغسلها في بلدك احسن حتى تاخد ثوابها ))

الخميس، 15 يوليو، 2010

شكلك هتتنصفى يا بنت المحظوظة

كل سنة و كل المسلمين و كل الشعب المصري بخير
رجب جري و شعبان شكله عايز يجري هو كمان و ربنا يسترها على رمضان
***********************
و تتوالى نجاحات مطلقات راديو ..... الحمد لله رب العالمين و يااااااااااااااااااا رب دايما
اول امبارح كنا ( محاسن و رانى زهران و العبده لله ) في احداث تصوير تقرير لقناة الأن
و على اد ما انا كنت حاسة انى مش مظبوطه و بالتالي لخبطت شويه في الانترفيو بس الحمد لله عدت على خير
و بجد بجد على اد ما شوفت اخلاق و زوق من اي فريق عمل تصوير حصل معايا و مع زمايلي قبل كده سواء اتذاع او اتقطع الجزء اللي انا فيه بالذات (( هههههههههههه حظي بئا ))
بس بجد عمري ما شوفت حد بالاخلاق و الزوق و الاحترام و الروح الحلوة اللي شوفتها اليوم ده من فريق العمل اللي كان بيصور معانا التقرير
الاستاذه هبه المعده و المراسلة و الاستاذ بلال المصور و الاستاذ محمد
جروب جميل اوي اوي ( ربنا يوفقهم و يحميهم يا رب )
(( مين بئا بنت المحظوظه دي ))
هيا المدونة المتواضعه جدا في كل حاجه دي
(( شوفتوا استغربتوا ازاي ؟؟؟ مش بقولكم ؟؟؟ انا كمان مستغربة ))
فعلا .. استغربت من فرط اعجاب الاستاذة هبه بالمدونة لدرجة انها اصرت ان المدونة تكون خلفيتى في الانترفيو بتاعي بدل من موقع الراديو
ساعتها استغربت زيكو كده و قولت في سري (( شكلك هتتنصفى يا بنت المحظوظة )) و الفضل طبعا يرجع بعد ربنا سبحانه و تعالى لمحاسن احلى صاحبة و اخت في الدنيا
المهم المهم....
قريب اوي هتتذاع حلقه مباشر على قناة الأن و هتكون الاستاذه محاسن صابر ضيفه فيها و هيتذاع التقرير مسجل
سواء ظهرت فيه او اتقطعت الحته اللي انا فيها ( كالعاده يعنى ههههههههههه) لازم تشوفوها و يا ريت يا ريت حد يسجلها و يبعتهلنا

الجمعة، 11 يونيو، 2010

حملة الورشه ... الموضوع طلع كبير اوي

قبل اي كلام و قبل اي حاجه لازم اقدم تعازيا للمرحوم خالد سعيد و اهله " ربنا يصبرهم و يقدرهم على اخذ و لو جزء من حقه "
و حسبنا الله و نعم الوكيل .
ـــــــــــــــــــــــــــــــــــــــــــــــــــــــــــــــــــــــــــــــــــــــــــــ
المدونة وحشتنى جدا جدا و مش عارفه ليه قصرت معاها الفترة اللي فاتت دي بس بقت بالنسبالي زي الصاحب المخلص اللي حتى لو انشغلت عنه ترجع بعد كده تلاقيه لسه صاحبك و لسه بيحبك و كل المدونات التانيه برده وحشتنى جدااااا رغم انى عارفه انى مالحقتش اوحش حد لانى معاكم عالفيس بوك على طول
بمناسبة الفيس بوك بئا ... قابلنى اليومين اللي فاتوا كلام عن مشروع جامد و جروب للمشروع
و هو مشروع حملة الورشة
و على اد ما مجرد الكلام عنه شادنى الى اني لما اشتركت في الجروب عرفت اهدافه احسن و اروع و الموضوع ما طلعش سهل خالص ده الموضوع طلع كبير اوي اوي و ده طبعا رأي الشخصي و اتمنى ان الحمله دي يكون ليها مستقبل كبير و ربنا يجازي خير كل من فكر فيها و اسسها و نتمنالهم كل خير
مش هطول عليكوا
كله موجود على اللينك ده

الجمعة، 19 مارس، 2010

أهلي .... أهلي ... أوه ..أوه

انا عارفه ان الاغنية دي ليها حقوق ملكية محفوظة للنادي الاهلي فمع الاعتذار و كل الاحترام للأهلي و الأهلاوية بس انا مقصدهومش هما
و كمان ما اقصدش أهلي انا فالحمد لله ربنا يخليهوملنا و يحفظهوملنا انا و اخواتى
دايما متفاهمين و عمرهم ما حسسونا بأي أذى نفسي او معنوي او مادي و دايما بيحافظوا على مشاعرنا (( بسم الله ... الله اكبر ... انتو حد فيكو بينوء و لا ايه هههههههههههه))
انا اقصد بنات تانية زي ما حكولي اصحابي في الشغل و اصحابي اللي لسه بتربطنا صداقه من ايام الجامعه ،،،،
قالولي حاجه مش معقوله بس حلفولي ان ده بيحصل و هو ان فيه اباء و امهات ممكن تأذي بناتها و الاخوات الولاد كمان ممكن ياذوا اخواتهم البنات بالكلام بسبب تأخرهم في الجواز ؟؟؟؟!!!!!!!!
ازاي يا جماعه هو فيه كده ابداً ؟؟؟!!!!!!
قالولي اه فيه !!!!!!!!!
مثلا واحده قالتلي ان ابوها كل شوية يقولها انتى مش هتخلصينا بئا و ذنب اخواتك البنات الاصغر منك في رقبتك هنجوزهم امتى ؟
و اللي تقولي : ماما عايزة تخلص مني و السلام و كل ما يجي عريس حتى لو فيه عيوب الدنيا تقولي ماله ده فيه ايه ماهو راجل ملو هدومه اهو افضلي كده ارفضي في العرسان كده لحد ما يتقطعوا من وشك ......
ولا كمان اللي بتقولي : اخوها الصغير بيقولها انتى هتفضلي كابسه على نفسنا اد ايه ..انا مش هستناكي و هتجوز .. انا مالي بيكي .. و
لا شكلك كده و لا هتقعدي في كوشه و لا هتشوفيها ......
و طبعا بيحكوا الكلام ده و هما بيعيطوا ،،،،، و كل مرة اقول لكل واحده فيهم ما تزعليش يمكن بيهزروا بس هزار تقيل شويه ... تقولي لا كانوا بيتكلموا بزعيق مش بهزار .... طيب ما تشوفي كده ايه اللي عصبهم عليكي كده .. تقولي هما كده قاصدين ياذوني و يسمموني في عيشتى ......
بس اللي انا عارفاه ان اكبر حب باخلاص هو حب الام و الاب لأبنائهم و الاخوات لبعض
و علشان كده ما سكتش و قعدت اسال و اطقس و اجرجر في الكلام ستات كبار و امهات معايا في الشغل لحد ما عرفت ان الاهل بيتعرضوا لضغط كبير اوي اوي اوي ................. ضغط يهد جبال (( الله يكون في عونهم بجد )) لانه ضغط ممكن ما يقدروش يستحملوه و خصوصا لما يكونوا كبار في السن و خلقهم ضاق بسبب كبر السن
الضغوط اقواها المبيد البشري اللي اتكلمت عليه قبل كده في البوست اللي كان بعنوان ( يل مبيداتك يا بلد ) ايوااااا بالظبط سم الفيران .. سوري قصدي كلام الناس و اللي مالوش حل ومالوش حدود لدرجة انه وصل لحد التشكيك في عفاف البنت قدام اهلها (( مش بقولكم الله يكون في عونهم )) و يقولولهم شوفوا يمكن حصلها حاجه و خايفه تقول و لا كانت بتحب واحد و ضحك عليها ....
( و الله ان ايدي بتترعش و انا بكتبلكم الكلام ده و لما سمعته من ام معايا في الشغل حاسيت انى بشيب و انا قاعده مكانى )
مابالكم بئا بام و لا اب لما يسمعوا الكلام ده عن بنتهم .... بجد مش عارفه اقول ايه
مش بس كده ده لما الاهل بيردوا و يقولوا لا بنتنا مش بتاعت الكلام ده و بنتنا قطة مغمضه .. برده الفيران قصدي الناس يردوا عليهم بكل برووووود و يقولوا برده شوفوا و اسالوها كده
(( الله يكون في عونهم )) ده كله ليه علشان البنت نفسها تتجوز جوازة كويسه و تكون سعيده و ما تتجوزش كداب و لا بخيل و لا نكدي و بتحلم بحياة سعيده يحصل فيها كده هيا و اهلها ؟؟؟؟؟ّ!!!!!!!!!!!!!!!
فعلا الليي بيستحملوه مش شويه و يهد جبال لما يتحظوا في موقف زي ده و خصوصا و انهم هيموتوا و يشوفوا بنتهم فرحانه و متستته في بيت جوزها فاكيد زعلهم بيكون دبل الطاق طاقين .
كتر خيرهم بجد انهم ما بيخرجش منهم غير شوية العصبية و كلمتين في الهوا زي كده ..
علشان كده قولت لصحباتى اللي كانوا زعلانين و كمان بقول لاي بنت حصل معاه موقف زي ده او مشابه لده (( ما تزعليش و استحملي و استوعبي .. اهلك شايلين عنك بلاوي و مش بيحكولك علشان خايفين على مشاعرك يبئا لما غصب عنهم يفلت منهم كلام لازم تستحمليهم ... و ان كان وصلك منهم لسعة نار منهم فهما عايشين جوه بركان ))
و ربنا يخليلنا اهلينا و يحفظهوملنا و يباركلنا في عمرهم يااااااااااااا رب اللهم امين

الأحد، 7 مارس، 2010

عرسان اخر جنان

السلام عليكم و رحمة الله و بركاته
من فترة اختى و حبيبتى حنين صاحبة مدونة همس الاحساس قالتلي " ايه رايك يا دودو تشتركي معانا في مدونة شقاوة اخر حاجه "
و لاني عندي عقدة العودة الى الطفوله و بموت في الضحك و الهزار و الشقاوة فوافقت طبعا و فرحت اوي اوي و خصوصا لما عرفت انها مدونة بجد شقيه اخر حاجه و مواضيعها خفيفه و كوميدية و فرحت اكتر لما لقيت المشتركين في المدونة مجموعه جميله اوي اوي اوي ( حنين همس الاحساس و pink dreams و اعشق في الليل ضوء القمر و ملائكة السماء و همس الارواح )) منهم اللي اتعرفت عليهم قبل كده و منهم اللي لسه ما اتشرفتش بمعرفتهم بس واثقه انهم بنات جمال اوي و حبوبين و طيوبين زي حنين بالظبط .
امبارح بئا حنين قالتلي ان معادي جه علشان انزل البوست بتاعي
ولاني الفترة الاخيره بقيت مشغوله من لا شيء مش عارفه ليه فقولت لحنين خدي الموضوع اهو و نزليه انتى و بعتهولها عالميل
و هيا كتر خيرها و تسلم ايديها يا رب و ربنا يخليها ليا نزلته
روحوا بئا شوفوه في المدونة الجميله الشقيه اللذيذه " شقاوة اخر حاجه " و ده اللينك بتاعها

الاثنين، 1 فبراير، 2010

اجري يا ابن ادم جري الوحوش

مبرووووووووووووووووووووووك
الف مبروك لمصر و لكرامة مصر

عمري ما كنت بفكر اتفرج على ماتش ولا اتابع مباراة ولا اي حاجه من الكلام ده
و لا افهم ايه فايدة الكاس ده ايه اصلا ...

و الناس اللي بيشدوا شعرهم قبل الماتش و بعده
دول كانوا ناس غريبين اوي اوي بالنسبالي

بس بعد ماتش مصر و الجزائر في السودان

بجد دمي اتحرق

بس حمدت ربنا اننا ما كسبناش علشان لو كنا كسبنا كنا اتقطعنا و اتدبحنا اكتر

و بدات اتابع و افهم ايه اللي بيحصل

و شوفت و اندمجت لدرجة انى لقيت نفسي بشد شعري انا كمان

و فجاة الاقي نفسي بقول (( ليييييييييييييييه ما جبتهاش ليه ما الجون فاضي اهوووووووووووووو ))

و اول ما الكورة تقرب على الحضري اتفاجئ بنفسي تاني و انا بصوت و بقول (( خللي بالك يا حضرررررررررريييييييييي
امال فين الدفاع هما راحو فييييييييييييييين ))

بيني اتهبلت و لا ايه معرفش ههههههههههههههه

لا و نهى كمان طلعت في دماغها الا نشتري علم و نعلقه في البلكونة

(( يا فضيحتنا يا نهى الناس تقول علينا ايه ))

بس يلا علشان افرحها خرجت معاها و اشتريلنا العلم و نقيته كبير و حلو كده علشان يبان و اهم حاجه ان النسر مظبوط و شكله جميل
و يلا مش خسارة

المهم تابعت الماتشات و شوفت ان ربنا اد ايه كريم بجد

و ازاي ربنا رجعلنا حقنا باكتر من ما كنا نتخيل او نتوقع

و لو كنا عملنا ايه برده ماكناش هنقدر نجيب حقنا زي ما ربنا جابهولنا

الحمد لله رب العالمين .........

و ساعتها بجد فرحت بالعلم المتعلق عندنا في البلكونة و كل شويه اروح اشقر عليه في البلكونة
ليكون طار ولا حاجه

و بيني و بينكم فرحت اكتر لما سمعت مقوله بتقول ايه بئا

(( ان الجزائر هتروح فين في وسط الفرق العالمية .... مش هتاخد في ايديهم فركه و هيطلعوا بدري من كاس العالم ))

مش هو ده كاس العالم اللي بهدلونا علشانه ........... خليهم يشربوا بئا

يعني سبحان الله ........... اجري يا ابن ادم جري الوحوش .. غير رزقك لن تحوش

الاثنين، 25 يناير، 2010

فرنسا الحرة ......

اولا ازيكم كلكم وحشتوني جدا جداااااااا
من اسبوعين تقريبا محاسن كلمتني و قالتلي " دودووووو... وكالة الاعلام الفرنسية اتصلت عليا و قالتلي عايزين يصوروا معانا علشان الراديو "
دولة فرنسا الشقيقة ؟؟ مرة واحدة ؟؟ يا حلاوة يا ولاد .....

ماشي و احنا مش هنقول لأ طبعا انتو عارفين .

( وقولتلهم يا محاسن انى منقبه ولا هروح اخد قلم زي يوم العاشرة مساءاً ) ده أنا اللي بقول

" ااااه قولتلهم و ردوا عليا و قالولي احنا مابتفرقش معانا منقبة ولا محجبة ولا بشعرها ... المهم انها يكون ليها دور فعال في بلدها "

و انتو طبعا عارفين دوري الفعال اوي في البلد ده حتى مصر ما بيجيلهاش نوم بليل الا لما بغطيها بايدي ...

المهم شوفتوا الاجانب بيفكروا ازاي ..... سبحان الله

محاسن بئا ربنا يخليهالي يا رب قالتلهم " طبعا دورها فعاااااال جداااااا

راحوا الناس مشكورين طبعا جم لحد عندنا الزقازيق و تاهوا فيها ساعه (( رغم ان الزقازيق صغيرة جدا و تلفها كلها في نص ساعه
معرفشي تاهوا فين الساعة دي ))

المهم وصلوا و قابلناهم بالاحضان بعد الغيبة ...

و كان معانا مخرجنا العبقري عمرو الشامي


بصراحة ناس كمل و في منتهى الأدب و الأخلاق و الاحترام و الاحتراف " مستر اسماعيل و ايناس و فيكتوريا و مينا " كلهم و الله

و اليوم بجد كان جميل اوي (( لا يعيبه سوى ثغرة طفيفة و هيا انهم كانوا بيتكلموا انجليزي معظم الوقت و ساعات لهجة تانية كنت بحسها لانى كده كده ماكنتش فاهمه ))

بس الحمد لله محاسن و عمرو كانوا فاهمين و غطوا الموقف و عدت بسلام و الحمد لله

و صوروا معانا مشاهد كتيرة اوي تمشي مسلسل مش برنامج عادي

و احنا طبعا فرحتنا الغامرة بفرنسا العامرة نستنا الدنيا و ما فيها .....
هتلاقوا صور اليوم ده عالفيس بوك

و في الاخر و احنا بنودعهم محاسن عرفت انهم من أصول عربية بس متجنسين كندي ... (( مش بقولكوا كان في لهجة تانية غريبة داخلة في وسط الكلام ... اهي طلعت كندي تقريبا برده مش متأكده ههههههههههه ))

بس السؤال بئا هنا ... ازاي الوكالة الفرنسية و ازي كلهم كنديين ؟؟؟ مش المفروض فرنسيين ؟؟ او حتى مصريين و مراسلين للوكالة الفرنسيه ؟؟؟ و اشمعنى كلهم كنديين و مش جنسيات مختلفه ؟؟؟

(( اللي يعرف يا ريت يقولي ))

و كذلك برده قناة الحرة صورت معانا امبارح أنا و محاسن و كان معانا " رامي " أحد مستمعين الراديو الجيدين جدا (*_^)

و كمان كان يوم جميل جدا بس من كتر الدوخة و الشغل اللي بدأ معايا انا و محاسن من بدري نسينا خالص ناخد اي صورة للذكرى مع قناة الحرة

بس معلش تتعوض و ربنا يخليللنا الراديو و يجعله عامر .........

السبت، 16 يناير، 2010

يا مبيداتك يا بلد


مبيدات مبيدات مبيدات في كل حته

المبيدات بقت مالية كل مكان دلوقتي

ممكن البنت تكون ماشيه في الشارع فجاه يقابلها مبيد

!!!!!!
ولا تكون قاعده في شغلها تلاقي مبيدات بتترش في وشها او من وراها بس الريحه توصلها

!!!!!!
ولا التليفون يرن تيجي ترد تلاقي المبيد في وشها !!!!! (( زي الكاميرا الخفيه بالظبط((


المبيدات دي بتكون موجوده في كلمة (( عقبالك يا حبيبتي )) وبتكون بترش في الوش كتير بريحة تخنق في كلمة


(( انتى اتجوزتي ولا لسه؟؟؟ !!!!.......اه يا حبيبتي ربنا يسعدك ))


(طبعا العلامات و عددها موضحه تعبيرات الوش للي بيرش المبيد (

و ساعات بئا المبيد بيرش بشكل كامل عالجسم كله بحيث انك حتى لو غسلت وشك برده مش هتنضف و ده بيكون في كلمة

(( انتى ما اتجوزتيش لحد دلوقتي !!!!! ليه يا حبيبتى ؟؟؟؟ ))

او على حد من قرايب البنت (( هيا قريبتك ما اتجوزتش ليه هيا مالها ؟؟؟ ((

ليه بس يا جماعه ؟ ليه بتصروا تقهروا البنات ؟؟؟

السؤال ده انا عارفه ناس كتير هترد عليا و تقول (( ايه ده ؟؟؟؟ هيا دعاء مالها كده ؟؟؟؟ ده نفسي اتطمن على فلانه و نفسي افرح بيها علشان كده بسالها ))

طيب هيا فلانه دي مش نفسها هيا كمان تفرح زي بقيت البنات ؟؟ اكيد نفسها ...........

و اكيد كمان انها لما تفرح هتعلن وهتقول ............. اكيد

يعنى انت هتعرف او انتى هتعرفي ان فلانه ربنا بعتلها نصيبها

هتعرفي يا اما منها او من بره المهم انك هتعرفي .....

ليه بئا تسالي ؟؟؟ انت او انتى عارفين بسؤالكوا ده بتعملوا ايه في البنت ؟؟

بتحطموها ( ايوة بتحطموها ) و بتحطموا اهلها اللي بيباتوا الليل بسببكوا يندبوا حظهم

انتو عارفين لو عملتم بالحكمه اللي بتقول (( دع الخلق للخالق )) انتو هترتاحوا و هتريحوا ( ايوا الله هتريحوا(

اتجوزت ما اتجوزتش .... اتخطبت فسخت .... اتجوزت اتطلقت .......... سنها كبر لسه صغيرة......

سيبوها في حالها ... سيبوها تعرف تعيش حياتها و تعيش سنها .... بلاش تدخلوا نفسكوا في حياتها باسم الخوف عليها ..........

ده حتى البنت ما بيبقاش في دماغها اصلا اي حاجه و كلام الناس هو اللي بيخليها تاخد بالها

و بعدين تفكر و بعدين تستنى و تنتهي باكتئاب لما ماتلاقيش الانسان المناسب .

وبعدين هو الجواز ده يعنى نهاية الكون يعنى

انتو كده بتحسسوها بالنقص و انها مش هتكتمل الا بالجواز

مع ان الصح بيكون العكس في الغالب

ان البنت بيبئالها دور فعال في المجتمع و مشتركة في كذا جمعيه و بتاخد كورسات و دبلومات

و اول ما تتجوز بتسيب كل ده و بتفضي نفسها لبيتها و عيالها

لو بتحبوها بجد ؟؟؟؟ اقفوا جنبها و ساعدوها انها تعيش حياة جديده و تلاقي نفسها بجد

و ساعدوها على صناعة مستقبل جديد لحياتها بعيد عن التفكير في الجواز و الاكتئاب

ولا انتو رأيكو ايه ؟؟؟؟؟؟؟