الأحد، 9 أغسطس 2009

احنا وصلنا

الاسبوع اللي فات محاسن قالتلنا انا و نهى ان فيه تصوير يوم السبت اللي هو امبارح
تصوير ايه يا محاسن؟؟
قالت ده تصوير لقناة دبي و الحرة و برنامج العاشرة مساءا على دريم ده غير مجلة الشباب
ده كله يا بنتي و كمان في يوم واحد
قالت اه ما احنا خلاص و صلنا
اه صحيح ده احنا وصلنا !!
قولتلها يا محاسن قوليلهم اني منقبه علشان لو كان في اي اعتراض..
قالت ما انا قولتلهم و قالوا ماشي موافقين
قولت طيب الحمد لله الدنيا لسه بخير...
المهم من ساعتها طبعا و احنا بنجهز في نفسنا و كلامنا اللي هنقوله
ويوم الجمعه ما جلناش نوم الا بعد الساعه 3 ونص
مش من الفرحه.. بس لاننا مش واخدين على النوم بدري وخصوصا ان محاسن قالت ان الجماعه بتوع العاشرة مساءا جايين الساعه العاشرة صباحا فكان لازم ننام بدري علشان نصحى مش اقل من الثامنة صباحا
المهم صحينا يوم السبت اللي هو امبارح و لبسنا و جهزنا نفسنا واتصلنا على محاسن لقيناها لسه صاحية من النوم ... مش مهم المهم انا احنا فضلنا قاعدين مستنينها لحد الساعه 10 و ربع و هيا لسه في بيتها !
فاتصلت علينا و قالت روحوا انتو علشان انا لسه قدامي شوية
علشان ماطولش عليكوا روحنا انا و نهى واستنينا محاسن واتعرفنا في الوقت ده على كيمو صاحب مدونة صوت من مصر و صاحب برنامج من شوارعنا و كمان اتعرفنا على اسلام صاحب مدونة اصحي يا مصر و صاحب برنامج من قلوبنا وقعدنا مع الجماعه بتوع العاشرة مساءا
ولان محاسن اتاخرت اوي فاضطر المصور انه يصور معايا انا و نهى تصوير سريع و احنا قاعدين على الكمبيوتر حاجه كده زي خلفيه للتقرير
وبعدين محاسن جت و صوروا معاها و صوروا مع نهى و كيمو واسلام وجم عليا انا و قالوا لا علشان دي منقبه...
قولتلهم نعم؟
مش انتي يا محاسن قولتلهم قالت انا قولت لبتوع قناة الحرة و دبي و مجلة الشباب ومكنتش متصورة ان قناة دريم ممكن ترفض
فجت معدت البرنامج _ الانسه بسنت _ و قالت اعتقد ان القناة ماعندهاش مانع و على العموم هنصورها و لو اعترضوا هنحذف الحته دي
راح المصور قايل لا انا مش هصورها و جه و قالي اكشفي وشك و لو في اوضه من الاوض و اصور معاكي علشان محدش من الموجودين يشوفك
قولتله نعم ؟؟؟ محدش من الموجودين يشوفني و بليل مصر كلها تشوفني ؟؟؟؟؟؟ لا طبعا
المهم عاند معايا وصور المجموعه في اكتر من حاجه و رفض انه يصورني معاهم
الأنسه بسنت جت اعتذرتلي و قالتلي معلش اصله مسيحي و مش عارف انه ماينفعش تكشفي وشك
قولتلها و لا يهمك انا ليه صحبات مسيحيين و بحبهم و بيحبوني ومتواصلين مع بعض من ايام الجامعه و الموضوع ده حاجه في دماغه مش مسألة مسيحي او مسلم
ماهو ممكن مسلم يعمل نفس الحركة دي لحاجه في دماغه برده
قالتلي ماتزعليش ...قولتلها مش زعلانه ولا حاجه بس انا مش هغضب ربنا علشان ارضي حد من البشر مهما كان
والتصوير مش مهم
و ربنا يهديه
و في نص كل ده المعد بتاع قناة الحرة و دبي اتصل بمحاسن وقالها ان المصور عمل حادثة و هنحدد معاد تاني
يا دي الحظ ههههههههه


المهم
يا جماعه افتحوا انهارده العاشرة مساءا علشان تشوفوا نهى اختى و محاسن و كيمو و اسلام
كلهم اخواتى و حبايبي

اه نسيت اقولكم ان الاستاذ كريم كمال في مجلة الشباب جه و عمل معانا كلنا لقاء صحفي و صورنا كلنا و بصراحه واضح انه عقليه كويسه جدا و محترم جدا و صحفي شاطر جدا جدا
ربنا يوفقه و يوفق الجميع

هناك 13 تعليقًا:

mahasen saber يقول...

كتر من الفضايح ياليى رايح

احمدك يا رب انها مجابتش سرة الميكروباص اليى بيحمل ههههههههههههههههه


يا دودو يا دودو انتى نجمة النجوم من غير اى تصوير ولاا تسجيل على الاطلاق

وبعدين ما انا كشفت وشك من زمان
وقلت دى وش نورا وصوت بوسى ههههههههههه

حاسه ان فيه طاسه اترفعت وهتنزل على دماغى ولاا ايه
عندك وجيه اتشطرى عليه يااختى هههههههههههههه

mahasen saber يقول...

بس سيبك انتى بالنفاب وكنتى قمر ومنوره بجد

وكلامك كان موزون وجميل يا دودو

ربنا يكرمك يا حبيبتى بكل خير

انا اتبسطت اكتر بالوقت اليى قضيته معاكوا بعد التصوير وكلام طنط صحصحنى على فكره وكبر الموضوع فى دماغى اكتر

ربنا يبارك فيكوا يا اجمل اخوات واصحاب عرفتهم من الشغل ابو ربعميت جنيه ده هههههههههههههه

دعاء عويضه يقول...

ربنا يخليكي يا محاسن ده من زوقك يا حبيبتي

بعدين صح انتي عملتي اللي وجيه ماعملوش و كشفتي وشي
ايه الفضايح دي ههههههههههه
ده انا حتى ما رضتش افضحك ولا اقول انك كنتي مستنيه الميكروباص يحمل و احنا قاعدين على اعصابنا ولا قولت اننا استنيناكل لقرب الضهر ههههههههههههههههههههههههه

ربنا يكرمك يا قمر و يوفقك دايما و ينورلك طريقك
ويزودلك الربعميت جنيه (بس ناخدهم )
هههههههههههههههههههههههههههههههههههه

دعاء عويضه يقول...

اه نسيت اقولك

انتي اختنا بجد وده طبعا مش محتاج كلام
والموضوع ده من زمااااااااااااان اوي وانتي عارفه

تأثير الفراشة يقول...

ألف مبروك ، و بالتوفقيق دايما إن شاء الله، للأسف ماعرفتش موضوع العاشرة مساءا ده غير النهاردة، إنما بإذن الله تتعوض

و ربنا يتقبل منك و يثبتك على الخير
تحياتى

دعاء عويضه يقول...

تأثير الفراشة

متشكرة جدا ليكي يا قمر و ان شاء الله تتعوض ولو حصل تاني اعرف اكتب قبل اذاعة الحلقة بوقت كافي علشان تعرفوا تشوفوها

و متشكرة جدا ليكي

ذو الوجه المبتسم يقول...

السلام عليكم
حلوة الجملة دي قوووى
محدش من الموجودين يشوفني و بليل مصر كلها تشوفني ؟؟؟؟؟

ضحكتينى بجد

ربنا يوفقك يا رب وتطلعى سلم النجومية على رأي اختنا محاسن صابر

اسلوبك فى السرد للاحداث ممتع وشيق جدا

متنسيش اخوكى بقي

خدونى معاكم المرة اللى جاية هههههه

تقبلى تحياتى اختى الصغيرة

ذو الوجه المبتسم يقول...

نسيت اقول لك
انا امبارح اتفرجت على البرنامج
وشفت اختنا محاسن
بس نهى ماخدتش بالى
بس سمعت نهى فى المدونة على راديو المطلقات

يبدو انها شخصية مميزة

ربنا يوفقكم

صيدلانيه طالعه نازله يقول...

ربنا يوفقكم كلكم و متزعليش نفسك
فيه ناس كتير تفكرهاعجيب و متتغريش بالوظايف المرموقه اللى بقت بتلم اغبى الناس

دعاء عويضه يقول...

اخويا ذو الوجه المبتسم

ربنا يديم عليك ابتسامتك يا رب

و متشكرة جدا جدا على كلامك

و طبعا مش هنسى حضرتك و اول لقاء جاي هنادي حضرتك يمكن تعرف تتصرف معاهم و تخليهم يطلعوني هههههههههههههه

و على فكرة بالنسبة لنهى ما ظهرش الحوار اللي تم معاها ولا حتى مع كيمو بس هما الاتنين ظهروا من ظهرهم و جنبهم بس
مش عارفه ليه ماجبوش الحوار اللي عملوه معاهم
يلا تتعوض مرة تانية

دعاء عويضه يقول...

صيدلانية طالعة نازلة

متشكرة جدا على حضور حضرتك و تعليقك

وانا بجد مش زعلانه بس عشت حبة في حالة زهول

بس خلاص راحت حالة الذهول الحمد لله و رجعت لطبيعتي هههههه

تأثير الفراشة يقول...

كل سنة و انت طيبة و فى أحسن حال

ملأ الله عيدكم بالسعادة
و رزقكم الحسنى و زيادة
و حبب فيكم ملائكته و عباده
تقبل الله منكم رمضان
و كل عام و أنتم بخير و إلى الله أقرب و فى طاعته أدوم إن شاء الله

عيــــــد سعيــــــد

Cute Kitty **sookra يقول...

انا مبسوطه انى عرفت ان فيه مدونه صاحبتها منتقبه اصل انا كمان منتقبه
وحاجات كتير بتقابلنى وتضايقنى اوى
تحياتى