الأربعاء، 29 يوليو 2009

ضاعت الفسحة وضاع الأمل

ماما امبارح قالتلي ماتشوفيلك خروجه اخرجيها مع صحباتك بدل ما انتي قاعده مخلله كده
قولت في سري انا مخلله طيييب مش هتشوفي وشي انهارده وروحت متصلة على صحباتي ( الاتنين اياهم بتوع البوست اللي فات ) و قولتلهم يلا نخرج ونتفسح انهارده طول اليوم

و احنا ماشيين بلغتهم ارائكم اللي كتبتوها في تعليقاتكم
لقيت كل واحده فيهم بتقول للتانية وانتى ايه اللي تاعبك انا تعبانه اكتر منك وفجاه دارت مناظرة بينهم فيها نوع من النفسنه و الضغينه
فعلشان اعرف احكيلكم اللي حصل من غير ما نلتخبط كلنا هنعتبر ان الاخت اللي لسه ما اتجوزتش هيا رقم 1 و الاخت اللي اتطلقت هيا رقم 2 واسمعوا بئا ايه اللي حصل
رقم 1 قالت انتي أحسن مني على الاقل الناس مش كل شوية يقولولك شدي حيلك ولا عقبالك يا حبيبتي و الكلام اللي وجعين قلبي بيه ده
رقم 2 قالت لا انتي الاحسن على الاقل الناس مش بيعملوا معاكي زيي كل شوية بيبصولي نظرات بتقتلني ده غير الكلام بئا ربنا يعوض عليكي يا حبيبتي و يا ترى مين فيكو الغلطان
ده انتى كمان فرصتك في الجواز احسن لانك لسه بنت بنوت ومافيش حاجه تشغلك لا عيل و لا تيل
راحت 1 قايلالها لالالالالا ده العرسان دلوقتي بيفضلوا المطلقه علشان مش هتطلب مهر كبير و عندها شقة و عفش كمان و العرسان غلابة اليومين دول و العيل اللي بتقولي انه شاغلك ده كفاية انه مسليكي و مالي عليكي حياتك حتى لو ما اتجوزتيش تاني هو كفاية في حياتك
راحت 2 قايلة مسليني ايه ده مطلع عيني و ماسك في ديلي رايح جاي ده حتى انتي بتعرفي تخرجي و تروحي و تيجي براحتك مش ملزومة من حد وماماتك و باباكي بيسيبوكي تخرجي براحتك في اي مكان و اي وقت يمكن تعرفي تتكعبلي في عريس و انتي ماشية انما انا اهلي دايما معارضين خروجي علشان سمعتي كمطلقه
قامت 1 قايلة ده انا لما بروح لواحده متجوزة و هيا صغيرة و ولدت اجي اشيل الطفل الاقي امه زي اللي خايفة عليه مني لأحسده و تقولي عقبال ما تشيلي يا حبيبتي ونظراتها مابتبقاش مريحة يبئا انتى احسن ولا لا على الاقل خلفتي والناس مش هيخافوا على عيالهم منك
راحت 2 قايلة انا بئا لما بزور واحده متجوزة مش بتخاف على عيالها مني بتخاف على جوزها مني يبئا انتي احسن ولا لأ

و فجأة راحو الاتنين بصين لبعض و بصين ليا نظرة ريا و سكينه ....... انا خوفت اوي و روحت بصالهم نظرة حسب الله... قصدي نظرة الضحية
فجاه قامو معيطين بداوا في عزف سيمفونية البكاء الشهيرة
طبطبت عليهم ووصلت كل واحده بيتها

وانا في طريقي للبيت فكرت في حاجتين مهمين جدا

اولا- معظم الشكاوي اللي اشتكوها سببها نظرة المجتمع للعانس و المطلقه رغم انهم مالهمش ايد في حالهم ده لان كل شيء قسمة و نصيب ودول نصيبهم كده
يا ترى ايه الحل اللي ممكن نقدمه للناس اللي بيعانوا من المشكلتين دول
و ازاي نغير نظرة الناس ليهم


ثانيا- لما اروح البيت هقولهم ايه اللي جابني بدري كده و روحت فين
وشي منك في الارض يا مامي


وضاعت الفسحة يا ولدي .. قصدي يا أمي
كفاية بئا قبل ما اعزفلكو السيمفونية اللي سمعتها

هناك 19 تعليقًا:

طوبه فضه وطوبه دهب يقول...

a3zreny elatnen nzrthm wtfkerhm kolo ghlat welsbab nzrt el mogtm3 el kolha ghalt el bt7ml el bnt ghalt kol shaa malhash znb feh whma lazm yktn3o an kol shaa nseeb el gwaz nseeb wltlaa nseeb kolo mkdar wkolo yser kma kodr lah

تأثير الفراشة يقول...

المشكلة فى إن كل واحد مش بيعجبه حاله و بيبص على سلبيات وضعه و إيجابيات وضع الشخص الآخر و ليس العكس، و لكن الأصح إن كل واحد على يقين من إن ربنا مش هيكلفه بما يفوق طاقته لأن ربنا سبحانه و تعالى أرحم الراحمين بعباده، فيبدأ يتقبل ده و يتعامل مع وضعه كما هو و يتعلم من الماضى و يعيش الحاضر و يخطط للمستقبل، بدل ما يبكى على حاله

الغريب إنى كنت بافكر اكتب بوست عن الموضوع ده،......... دعواتك

على كل حال أتمنى إن أحوالهم تنصلح إن شاء الله

تحياتى لكى

دعاء عويضه يقول...

طوبة ذهب و طوبة فضة
فعلا نظرة المجتمع هيا السبب
و البنات عارفين ان كل شيء نصيب ومقدرين ده
بس الناس مابترحمش و بتخليهم يطلعوا عن شعور الرضا بالنصيب

دعاء عويضه يقول...

تأثير الفراشة
ساعات البنت بتكون مقدرة ان ده نصيبها و ان ربنا مقدرهولها وزي الايه ما بتقول ( قل لن يصيبنا الا ما كتب الله لنا ) و الايه الكريمة برده اللي بتقول ( لا يكلف الله نفسا الا وسعها )

بس الناس و المجتمع ساعات بيبقا ليهم كلام زي السم و نظرات تقتل بتخلي البنت ممكن تنسى حالة الرضا اللي كانت فيها و تقضيها عياط
المجتمع مابيرحمش اي بنت جه نصيبها ان جوازها يتاخر واي ست جه نصيبها ان جوازها مايتمش

و ربنا يوفقك الجميع

Mysara يقول...

فعلا سيمفونية أبلغ من أي حوار..

شريكة في المطعم يقول...

ازيك يا دودو...
هو زي ما قولنا كده
محدش عاجبه حاله...
بس من رأيي حال المطلقة هو الأصعب
لان مهما الناس اتطورت واتثقفت، بتفضل عندهم نفس النظرة دي..خصوصا الكبار شوية في السن
كمان لازم يعرفوا السبب والصغيرة قبل الكبيرة..
ده غير ان بيفكروا ان كده خلاص اي حد يجيلها
لازم تقبل بيه وكويس انه جه من أصله!!!
ربنا يصلح الأحوال ان شاء الله
ومعلش بقى الفسحة تتعوض ;)

mohamed ghalia يقول...

هى الناس كده محدش عاجبة أى حاجة
ربنا يوفق الجميع

Unknown يقول...

ازيك
هههههههههه
حلوة المناظرة دي اوي
زمان رقبتك وجعتك
في كل الاحوال
المجتمع بتاعنا فقير جاهل و اهم حاجة حشري !
احسن حاجة التنفيض
و فعلا كل واحدة صح في رايها لأن في عينات من الناس اللي اتكلمتم عليهم في كل نقطة

ما علينا ! شدي حيلك :p

دعاء عويضه يقول...

ميسرة
شكرا على مشاركتك
و يا رب مايكتبها على حد السيمفونية دي هههههههههههه

دعاء عويضه يقول...

شريكة في المطعم
فعلا محدش عاجبه حاله بس ساعات اي حد بيصبر على حاله و اهي ماشية بس الناس بتخرجه عن صبره بكلامهم ونظراتهم
وبالنسبة للنظرة للمطلقه ... العانس كمان ليها نفس النظرة ولما البنت بتكبر فوق ال30 الناس برده بينظروا ليها نظرة انها لو جالها واحد متجوز ومخلف يبئا خير و بركه
وكويس انه جالها وشايفين انه اكيد محدش هيجيلها احسن منه

ربنا يهدي الناس اللي بتفكر كده سواء ان كان للمطلقه او العانس

دعاء عويضه يقول...

محمد غالي
محدش فعلا عاجبه حاله بس برده لما بيصبر على حاله المجتمع ما بيسيبوش في حاله

ربنا يهديهم

دعاء عويضه يقول...

المعلم محمد صاحب المطعم
الشده على الله
و ربنا يهدي الناس اللي زي دول و يصبر البنات اللي بتعاني منهم

اعشق فى الليل ضوء القمر يقول...

يا خساره راحت الخروجه على فشوش
معلش
تتعوض فى حكايه تانيه
الصراحه انا مش عايز اعلق على البوست مش علشان وحش ولا حاجه لكن علشان بيمس إنسانتان لهن مشاعر

بس المجتمع و الناس و ظروف المعيشه هما السبب الثانى
والآول عدم الالتجاء لله

دعاء عويضه يقول...

اعشق في الليل ضوء القمر

متشكرة جدا على مشاركتك و تعليقك
على فكرة اتكلم براحتك لاني هقولك على سر ها اوعى تقوله لحد ههههههههه
الشخصيات اللي في القصة دي من وحي خيالي و حالات بشوفها من بعيد
ولو كان ليا صحبات كده بجد ما كنتش كتبتب كده عنهم ابدا
انا بحاول احل المشاكل اللي بتتعرض لها العانس و المطلقة بشكل كوميدي ومش جدي

اعشق فى الليل ضوء القمر يقول...

برافوا تخيلى مكنتش عارف حاجه زى كده
اقولك انا هقولها بعلو صوتى اخلى الناس تعرف الحقيقه (وش شرير بيضحك)
ولا بلاش انت قلتى لى انا بس وخلاص هخليها فى سرى
مش هقولها لحد خالص(صوت مرتفع أثناء الكلام)

دعاء عويضه يقول...

ههههههههههههههههههههههههههههههههه

ايوة كده خليها في سرك مش عايزين حد من الجران يعرااااااااااااااااااااااااااااف
ههههههههههههههههههههههههههههههههههه

ذو الوجه المبتسم يقول...

السلام عليكم
ازيك يا دودو
معلش اتاخرت فى الزيارة بس غصب عنى بجد
النت كان تعبان قووى اليومين اللى فاتو
بصي يا سيدتى
مهما عملنا ومهما قلنا
فنظرة المجتمع ستبقي كما هى
ولو سألنا انفسنا هو مين المجتمع ده
هتلاقي الناس اللى حواليكى وحوليا والناس اللى تعرفنى وتعرفك
لكن لو ناس مش عرفاكى ايه اللى يهمهم انهم يعرفوا عنك اذا كنتى بنت ولا متزوجة ولا مطلقة ولا غيره

رأيي الشخصي فى الموضوع ده اللى هو نظرة المجتمع
انى اعمل اللى انا عاوزه بالشكل اللى انا عاوزه بدون تعدى لحدود الدين والادب والاحترام

واذكرك بآية قرآنية ربنا سبحانه وتعالى قال
" ولقد خلقنا الانسان فى كبد "

العوامل النفسية مؤثرة جدا على تصرفات الانسان منا
لكن علينا التفكير بعقلانية اكثر

تحياتى لك ولصديقاتك

ذو الوجه المبتسم يقول...

نسيت اقول لك على حاجة مهمة بخصوص مش عايزة اعنس مش عايزة اتطلق

فيه شئ مهم جدا فى الزواج اسمه الاحتواء بين الزوجين
لو كل زوجين عملووووه هتلاقي الحياة حلوة بجد
وعمرك ما هتفكرى في الطلاق ابدا
الحياة الزوجية ممتعة جدا
وربنا يرزق كل المسلمات بالزوج الصالح

دعاء عويضه يقول...

ذو الوجه المبتسم

متشكرة جدا على اهتام حضرتك بالرد على مواضيعي

و فعلا كلام حضرتك صح

بس فيه مشكلة ان البنات مابقاش عندها احساس بالامان بسبب نسب العنوسة و الطلاق اللي بيزيدوا وده اللي بتكلم عنه في الراديو
ده مش اعلان عن الحلقه لا و الله
هههههههههههههههههههه
ما انا عملت اعلان تاني خلاص
هههههههههههههههههههههه

وبالنسبة لنظرة المجتمع كلامك مظبوط بس بحاول على الاقل اني اغير نظرتهم للبنات اللي بتاعني لان ممكن يكون في كل عائلة وخصوصا في الايام دي و الايام اللي جاية هيكون فيها عينات من دي
فا ارحموا ترحموا

ربنا يكون مع الجميع