الخميس، 3 فبراير، 2011

هيأمنك و هيحفظك و هيسلمك




ده لا شعر و لا نثر


دي مجرد خواطر


مجرد مشاعر و احاسيس


متلخبطة او بالاحرى متلعبكة


بس حاسة انى لازم اقولها


يمكن تنفع بحاجه في الظروف دي


حوار بيني و بين مصر


ماليش دعوة مؤيدين و لا معارضين


مأجورين و لا مثقفين


كلهم مصريين بس الظروف اللي واجهتهم قدام بعض


---------




مالك يا مصر سلامتك


حزينة .. زعلانة .. مقهورة


مرعوبة و قلقانة و مجبورة




كنتي شابه في عيونا و جميلة


بتتمايلي غندورة و بهية


و فنفس الوقت عفية و آبيه




شوفت في سنواتك الأخيرة قطع في ثوبك


بس كنتي بتحاولي تداريه


و كنت بداريه معاكي


و أصلاً ده كان مجرد عيب بسيط علشان ماتوصليش للكمال


مش لحاجة غير لأن الكمال لله وحده




و علشان كمالك سر جمالك


طول عمرك فخر الغرب و العرب


الكل بيقدرك و يعظمك




يبئا مالك بئا ؟؟؟ !!!




ولادي بيدبحوا بعض


مش بس كده


بيستمتعوا في التدبير لطرق الدبح


و الباقي يا عيني مجروحين


اللي في جسمه و اللي فقلبه




ايام الحروب و العدوان من بره


كنت بشموخي و ولادي بيموتوا


كانوا بيزرعوا الحرية و الخير في أرضي بدمهم


كنت باخدهم في حضني و أقولهم


ربي و ربك مستنيك تروح تتنعم في جنته




لكن دلوقتي .....


إخوات بيضربوا بعض .. بيرهبوا بعض .. بيحرقوا بعض .. بيموتوا بعض .. بيدبحوا بعض


مافكروش في بعض ؟؟


فرحان بشكل أخوه و هو سايح في دمه ؟؟؟!!!




إزاي ؟؟؟؟؟؟؟


ازاي نسيوني ؟؟ و قبلي نسيوا ربهم ؟؟


و لا افتكروا أية و لا حديث او حتى لحظة حلوة عاشوها في أرضي ؟؟




انا عارفة ان منهم حاول يحافظ على أخوه و فكر فيا


بس أخوه تغيب خالص بسبب أي سبب




طول ما هما كده هفضل عاجزة و عجوزة


و يا خوفي يا ولادي لتسيبوني أموت


أوعوا يا ولادي ... أوعوا يا ولادي






الظاهر ان قطعك وسع و عيبك كبر


كان المفروض تعالجيه بدل ما تداريه


بس العيب مش عيبك


العيب فاللي سكت من سنين




الله معانا و معاكي يا أمنا


و زي ما قال " ادخلوها بسلام آمنين "




هيأمنك و يحفظك و يسلمك

هناك 6 تعليقات:

شمس النهار يقول...

ان شاء الله خير

والحرية تمنها غالي

شاب مطلق يقول...

بجد يا دودو, كلامك جميل, ووصل للقلب, لأنه طالع من القلب...
ربنا ياخد بأيدينا, وياخد بأيدي مصر...
الكلام ده موجه لكل الشباب, اللى خرجوا معانا يوم 25 و28 يناير, واللى لسة موجود هناك فى التحرير...

ان كنتم تريدون فوضي ..... فقد حققتوها
إن كنتم تريدون تغيير ..... فقد غيرتوها
إن كنتم تريدون الرئيس ..... فهو معنا حتي نهايه الفتره
إن كنتم لا تريدون الرئيس ..... فقال إنه لن يرشح نفسه مره اخري....
إن كنتم تريدون النهضه ..... فقد حان الوقت لنساعد بعضنا ...لننهض مره أخري...
وإن كنتم تتظاهرون بدون هدف ..... فأتركوا مصر لأن شعبها أعظم الشعوب
***********************************
شددتم الساق المائل حتى قومتموه
فشكرا ولكن
إن استمر الشد فإما أن
يختنق الساق أو تنقطع الرقاب
أسكتوكم حتى صرختم.....
.صرختم حتى أسمعتم الاصم..........
ولكن إن استمر الصراخ...فسيصمُ السامع....
خرجتم لأن البلد تأنُ منهم...
فعودوا لأن البلد تأنُ منكم......

هذا والله الموفق, يارب نعبر المحنة, ونستفيد من الدرس, كفاااااااية خراب, كفاية دمار, انا واحد من الناس مش عارف حتى اجيب سجاير...
ربنا يوفقك يا دودو, ومعلش رغيت كتير...

nona يقول...

تسلمى يا دودو
ويسلم كلامك واحساسيك
وربنا يحرس مصر ويحافظلنا عليها

دعاء عويضه يقول...

شموسه
يااااااااااا رب يا شموسه
و ياااااااا رب ما يطولشي علينا و على مصر كلها

دعاء عويضه يقول...

شاب مطلق

اهلا بيك نورت مدونتي المتواضعه

مع احتلرامي لرأيك جدا
بس معلش دم الشهداء دول في رقبة مين ؟
و هل علشان لقمة عيش و لا علبة سجاير نضيع مجهود كبير عدى
و معاه نضيع عيشة كريمة في المستقبل ان شاء الله

تحياتي لحضرتك

دعاء عويضه يقول...

نونا
نورتيني يا حبيبتي

هنعمل ايه الوضع الراهن فك عقدة السنتنا كلنا بئا :))