السبت، 16 يناير 2010

يا مبيداتك يا بلد


مبيدات مبيدات مبيدات في كل حته

المبيدات بقت مالية كل مكان دلوقتي

ممكن البنت تكون ماشيه في الشارع فجاه يقابلها مبيد

!!!!!!
ولا تكون قاعده في شغلها تلاقي مبيدات بتترش في وشها او من وراها بس الريحه توصلها

!!!!!!
ولا التليفون يرن تيجي ترد تلاقي المبيد في وشها !!!!! (( زي الكاميرا الخفيه بالظبط((


المبيدات دي بتكون موجوده في كلمة (( عقبالك يا حبيبتي )) وبتكون بترش في الوش كتير بريحة تخنق في كلمة


(( انتى اتجوزتي ولا لسه؟؟؟ !!!!.......اه يا حبيبتي ربنا يسعدك ))


(طبعا العلامات و عددها موضحه تعبيرات الوش للي بيرش المبيد (

و ساعات بئا المبيد بيرش بشكل كامل عالجسم كله بحيث انك حتى لو غسلت وشك برده مش هتنضف و ده بيكون في كلمة

(( انتى ما اتجوزتيش لحد دلوقتي !!!!! ليه يا حبيبتى ؟؟؟؟ ))

او على حد من قرايب البنت (( هيا قريبتك ما اتجوزتش ليه هيا مالها ؟؟؟ ((

ليه بس يا جماعه ؟ ليه بتصروا تقهروا البنات ؟؟؟

السؤال ده انا عارفه ناس كتير هترد عليا و تقول (( ايه ده ؟؟؟؟ هيا دعاء مالها كده ؟؟؟؟ ده نفسي اتطمن على فلانه و نفسي افرح بيها علشان كده بسالها ))

طيب هيا فلانه دي مش نفسها هيا كمان تفرح زي بقيت البنات ؟؟ اكيد نفسها ...........

و اكيد كمان انها لما تفرح هتعلن وهتقول ............. اكيد

يعنى انت هتعرف او انتى هتعرفي ان فلانه ربنا بعتلها نصيبها

هتعرفي يا اما منها او من بره المهم انك هتعرفي .....

ليه بئا تسالي ؟؟؟ انت او انتى عارفين بسؤالكوا ده بتعملوا ايه في البنت ؟؟

بتحطموها ( ايوة بتحطموها ) و بتحطموا اهلها اللي بيباتوا الليل بسببكوا يندبوا حظهم

انتو عارفين لو عملتم بالحكمه اللي بتقول (( دع الخلق للخالق )) انتو هترتاحوا و هتريحوا ( ايوا الله هتريحوا(

اتجوزت ما اتجوزتش .... اتخطبت فسخت .... اتجوزت اتطلقت .......... سنها كبر لسه صغيرة......

سيبوها في حالها ... سيبوها تعرف تعيش حياتها و تعيش سنها .... بلاش تدخلوا نفسكوا في حياتها باسم الخوف عليها ..........

ده حتى البنت ما بيبقاش في دماغها اصلا اي حاجه و كلام الناس هو اللي بيخليها تاخد بالها

و بعدين تفكر و بعدين تستنى و تنتهي باكتئاب لما ماتلاقيش الانسان المناسب .

وبعدين هو الجواز ده يعنى نهاية الكون يعنى

انتو كده بتحسسوها بالنقص و انها مش هتكتمل الا بالجواز

مع ان الصح بيكون العكس في الغالب

ان البنت بيبئالها دور فعال في المجتمع و مشتركة في كذا جمعيه و بتاخد كورسات و دبلومات

و اول ما تتجوز بتسيب كل ده و بتفضي نفسها لبيتها و عيالها

لو بتحبوها بجد ؟؟؟؟ اقفوا جنبها و ساعدوها انها تعيش حياة جديده و تلاقي نفسها بجد

و ساعدوها على صناعة مستقبل جديد لحياتها بعيد عن التفكير في الجواز و الاكتئاب

ولا انتو رأيكو ايه ؟؟؟؟؟؟؟

هناك 24 تعليقًا:

عاشقة القمر يقول...

ازيك ياقمره مشكورة علي بوست جميله كلام صح

شمس النهار يقول...

دودو

طول ماانا بقرا البوست حاسه انك بتقريه بصوتك وبطريقه ساخره

ضحكتيني

فعلا مبيد بشري صح

الجواز قسمه ونصيب ولما بيجي النصيب ماحدش بيقول لا

البنت المفروض تنمي عقلها وتعلمها وثقافتها
ياستي حتي من باب انها تفيد عيالها في المستقبل او حتي عيال اخواتها او حتي ابناء المجتمع
وفي الاول تفيد نفسها

تسلمي

دعاء عويضه يقول...

عاشقة القمر

حبيبتى ربنا يعزك و ميرسيه ليكي جدااااا

دعاء عويضه يقول...

شمس النهار

انا مبسوطه جدا ان البوست عجب حضرتك
و مبسوطه اكتر انه ضحكك

و هو ده اللي كنت اقصده
ان المجتمع بكلامه اللي بيوصصلها للاكتئاب بيعطل البنت انها تقوم بدور كبير في مجتمعها هيفيدها و يفيد مجتمعها و يفيد اولادها بعد كده

بجد متشكرة جدا لحضرتك

موناليزا يقول...

متفقة معاكِ قلبا وقالبا طبعا

Mahmoud البطراوى يقول...

أحلق انا خارج السرب ممكن؟

امتى انا ازعل لو حد سألنى عملت ايه السنه دى فى الدراسه؟
لو طالع الاول مش هزعل .. بالعكس هفرح

لو بقى كنت راسب اكيد هزعل من السؤال صح؟
طب لو انا جايب مقبول هنا هتفرق بقى من شخص لشخص فى نظرته للمقبول
حد هيقولها بفخر وشخص هيقولها ووشه للارض.

احساس الواحده انه ناقصها حاجه هو اللى بيخليها تزعل .. لكن لو انطلقت فى حياتها على انها مش ناقصها حاجه

لو اعتبرت نفسها اصلا ناجحه
السؤال مش هيزعجها

العيب فى نظره الواحده لنفسها مش فى السؤال اظن

mohamed ghalia يقول...

معاكى حق
سيبوهاااااااااااااااااااااااا

دعاء عويضه يقول...

موناليزا

ميرسيه ليكي يا قمر

و انا متاكده ان حزب النساء و البنات متفقين على الموضوع ده و خصوصا اللي عانا منه

دعاء عويضه يقول...

بطوط حبوب

ميرسيه جدا ليك

بس الموضوع مختلف جدا
اي حد يكون في الموقف اللي بتحكيه اكيد ثقته في نفسه و عمله الناجح هيقويه و مش هيخلي كلام الناس يفرق معاه

بس الوضع للبنت مع المبيدات مختلف جدا لان البنت بيكون نفسها تتجوز و تعيش حياة كريمة و اولاد تربيهم و تعيش معاهم الامومه
لكن الوضع ان نصيبها يتاخر او ما تعيشي حياه كريمة مع جوزها او ما تخلفش ده كله مش بايديها

فممكن تصبر و تعيش صابرة و راضيه

لكن كلام الناس اللي بيقلب المواجع و يخللي الصبر ينفد

دعاء عويضه يقول...

mohamed ghalia

ميرسيه خااااالص ليك

مش كده برده ؟؟؟

و بعدين علي صوتك شوية لو سمحت علشان لسه في اتنين في اسوان اتصلوا و اشتكوا انهم ما سمعوش
ههههههههههههههه

الجواز و سنينه يقول...

ياه فكرتينى بأيام زمان
كنت انا و كام واحده كده بطلنا نروح حتى الافراح علشان الكلام الغلس ده
تلاقى بقى الكلام من نوع القمر ده قاعد لغايه دلوقت ليه ؟
و عقبالك ان شاء الله
و كأن العروسه كسبت فى ديل اور نو ديل و احنا لاء
بس اتسترت و الحمد لله
بكره تفتكرى الايام دى و تضحكى
مش المشكله فى ان الوحده تتجوز
المشكله انها تختار حد تتوافق معاه و يريحها و هيه كمان تسعده
لو وصلتيله ما تتردديش ثانيه

dr.lecter يقول...

المبيد هو القادر علي اباده اي شكل من اشكال الحياه

في زمننا وفي مجتمعنا هو القادر علي اباده انفس البشر بالخنقه والغباء والتخلف والعند والتقاليد الباليه

تأثير الفراشة يقول...

بجد يا دعاء كلامك فى محله تماما ، و ياريت الناس تعمل بحديث الرسول صلى الله عليه و سلم "من كان يؤمن بالله و اليوم الآخر فليقل خيرا أو ليصمت" صدق رسول الله صلى الله عليه و سلم

للأسف دى بقت احدى المظاهر الاجتماعية السيئة اللى تواجدت بكثرة هذه الايام


سلم إيديكى على البوست الجميل ده

خالص تحياتى

دعاء عويضه يقول...

الجواز و سنينه

ميرسيه جدا جدا ليكي بجد تعليقك عندي بسطتني جدا

هو ده فعلا اللي انا اقصده من المدونة ان البنت لازم تختار كويس اوي و ما تاخدش العريس اللي يقابلها علشان تلحق نفسها من العنوسه و توقع نفسها في مشكله طلاق او عيشه مقهورة
بس كلام الناس هو اللي بيخليها تتجوز بسرعه علشان تخلص من كلامهم

و موضوع الافراح ده موجود عند معظم البنات حتى اللي لسه في اوائل العشرينات

بجد ربنا يهدي الناس اللي بتتكلم دي و يخليهم في حالهم بئا
ههههههههههههههه

دعاء عويضه يقول...

dr.lecter

فعلا يا دكتور بجد كلامك في الصميم

ميرسيه خالص ليك

دعاء عويضه يقول...

تأثير الفراشة

ميرسيه لحضرتك يا دكتورة
و بجد يا ريت الناس تمشي على الكتاب و السنة ماكانش حد فينا اشتكى من حاجه
بس الحمد لله رب العالمين

rovy يقول...

السلام عليكم
أزيك يا دودو يارب دايما بخير حبيبتى
بوست جميل و فكره المبيد البشرى ظريفه :)
عندك حق اكيد فى كل كلمة
الجواز قسمة و نصيب زى الميلاد و الموت محدش يقدر يتحكم فيهم ابدا ..

تحياتى و مودتى

Kiara يقول...

بصراحه معاكي حق السؤال دا غلس اوووووووووووووووووووووووي ومعاكي حق

والموضوع في الاول والاخر قسمة ونصيب

موضوع رائع يادودو

دعاء عويضه يقول...

rovy
و عليكم السلام و رحمة الله و بركاته

بجد انا مبسوطة جدا جدا جدا على تشريفك ليا في مدونتى المتواضعه جدا دي

و كمان مبسوطة ان البوست عجبك
و بجد بتمنى انك تشرفيني دايما و تقوليلي رايك في موضوعاتي البسيطة

دعاء عويضه يقول...

كيـارا

ميرسيه ليكي يا قمر

و بجد زيارتك مدونتي بسطتني جدا و يا ريت ما تقطعيش الزيارات

Baskouta يقول...

اول مرة ازورك في مدونتك
عجبني الموضوع اللى كاتباه
وكنت دايما اسال نفسي
ايه الرد المناسب لما واحدة تسال
انتى ليه لسة متجوزتيش لحد دلوقت يا حبيبتي؟؟؟؟؟؟
سؤاااااااال غبي غبي
يعني البنت تعمل ايه وترد بايه
هتنزل تشد اي راجل وتقوله تعالى اتجوزنى والنبي لان طنط فلانة مضايقة انى لسة متجوزتش لحد دلوقت

حاجة غبية وناس غبية وسؤال اغبى

بس هي الدنيا كدة لازم المبيدات والا هنعيش ازاي يعني
هههههههه
تحية بسكوتية

سارة درويش يقول...

:(( بيحسسوني اني كبرت اوووووووووي يا دودو رغم اني حاسة اني لسة طفلة
والله بنصدم بجد لما الاقيهم يقولوا لي اتخطبتي ولا لسة او يقعدوا يدوروا في ايدي على دبلة
رغم اني لسة في دماغي اني 18 سنة

بجد بيضايقوا بنات كتير اوي وبيحرجوا بنات كتير وبيخلوا بنات كتير توافق بأنصاف رجال علشان تتخلص من لقب عانس او تتخلص من المبيدات ع رأيك

دعاء عويضه يقول...

Baskouta
نورتيني بجد و انبسطت جدا من تعليقك و يا ريت تزورينى و تنوريني دايما

فعلا المبيدات دي موجوده ولازم منها بس هنعمل ايه

و على فكرة بدام عجبك الموضوع دع بذات يبئا ان شاء الله هيعجبك البرنامج بتاعي على مطلقات راديو ابئي تابعيني فيه
و على فكرة قولت فيه نفس كلامك بتاعك في الحلقه اللي اتذاعت يوم السبت اللي فات و هتتعاد يوم السبت اللي الجاي ان شاء الله

و ميرسيه ليكي يا قمر

دعاء عويضه يقول...

سمو الأميرة سارة

ميرسيه خالص خالص على زيارتك الجميله و تنويرك ليا مدونتي المتواضعه دي

ثانيا انتى لسه صغنونه خالص يا سارة على ان الموضوع ده يقلقك بس منهم لله الناس اللي كلامهم سم و ما بيفرقش بين كبيرة و صغيرة

و فعلا كلامهم بيخلوا البنات توافق على اي حد و السلام علشان تخلص من لقب عانس و ممكن بعد كدع تحصل على لقب مطلقه و هيا دي الكارثة

ميرسيه ليكي يا قمر
تحياتي