الاثنين، 25 يناير 2010

فرنسا الحرة ......

اولا ازيكم كلكم وحشتوني جدا جداااااااا
من اسبوعين تقريبا محاسن كلمتني و قالتلي " دودووووو... وكالة الاعلام الفرنسية اتصلت عليا و قالتلي عايزين يصوروا معانا علشان الراديو "
دولة فرنسا الشقيقة ؟؟ مرة واحدة ؟؟ يا حلاوة يا ولاد .....

ماشي و احنا مش هنقول لأ طبعا انتو عارفين .

( وقولتلهم يا محاسن انى منقبه ولا هروح اخد قلم زي يوم العاشرة مساءاً ) ده أنا اللي بقول

" ااااه قولتلهم و ردوا عليا و قالولي احنا مابتفرقش معانا منقبة ولا محجبة ولا بشعرها ... المهم انها يكون ليها دور فعال في بلدها "

و انتو طبعا عارفين دوري الفعال اوي في البلد ده حتى مصر ما بيجيلهاش نوم بليل الا لما بغطيها بايدي ...

المهم شوفتوا الاجانب بيفكروا ازاي ..... سبحان الله

محاسن بئا ربنا يخليهالي يا رب قالتلهم " طبعا دورها فعاااااال جداااااا

راحوا الناس مشكورين طبعا جم لحد عندنا الزقازيق و تاهوا فيها ساعه (( رغم ان الزقازيق صغيرة جدا و تلفها كلها في نص ساعه
معرفشي تاهوا فين الساعة دي ))

المهم وصلوا و قابلناهم بالاحضان بعد الغيبة ...

و كان معانا مخرجنا العبقري عمرو الشامي


بصراحة ناس كمل و في منتهى الأدب و الأخلاق و الاحترام و الاحتراف " مستر اسماعيل و ايناس و فيكتوريا و مينا " كلهم و الله

و اليوم بجد كان جميل اوي (( لا يعيبه سوى ثغرة طفيفة و هيا انهم كانوا بيتكلموا انجليزي معظم الوقت و ساعات لهجة تانية كنت بحسها لانى كده كده ماكنتش فاهمه ))

بس الحمد لله محاسن و عمرو كانوا فاهمين و غطوا الموقف و عدت بسلام و الحمد لله

و صوروا معانا مشاهد كتيرة اوي تمشي مسلسل مش برنامج عادي

و احنا طبعا فرحتنا الغامرة بفرنسا العامرة نستنا الدنيا و ما فيها .....
هتلاقوا صور اليوم ده عالفيس بوك

و في الاخر و احنا بنودعهم محاسن عرفت انهم من أصول عربية بس متجنسين كندي ... (( مش بقولكوا كان في لهجة تانية غريبة داخلة في وسط الكلام ... اهي طلعت كندي تقريبا برده مش متأكده ههههههههههه ))

بس السؤال بئا هنا ... ازاي الوكالة الفرنسية و ازي كلهم كنديين ؟؟؟ مش المفروض فرنسيين ؟؟ او حتى مصريين و مراسلين للوكالة الفرنسيه ؟؟؟ و اشمعنى كلهم كنديين و مش جنسيات مختلفه ؟؟؟

(( اللي يعرف يا ريت يقولي ))

و كذلك برده قناة الحرة صورت معانا امبارح أنا و محاسن و كان معانا " رامي " أحد مستمعين الراديو الجيدين جدا (*_^)

و كمان كان يوم جميل جدا بس من كتر الدوخة و الشغل اللي بدأ معايا انا و محاسن من بدري نسينا خالص ناخد اي صورة للذكرى مع قناة الحرة

بس معلش تتعوض و ربنا يخليللنا الراديو و يجعله عامر .........

هناك 13 تعليقًا:

غير معرف يقول...

السلام عليكم
موفقة أنت وزميلاتك لكن السؤال الهام ما هو محتوى التسجيل ؟

ماذا دار وماذا حدث ؟ أنتظر الرد إن شاء الله

شمس النهار يقول...

شوفتي يادودو الناس بره بتبصلنا ازاي
او لأي بني ادم
بعمله بقيمتة بعطائه

المهم انكم رفعتوا راسنا
::))

تسلموا ويسلم الراديوا ياقمر

سلامي

دعاء عويضه يقول...

أحمد شريف

و عليكم السلام و رحمة الله و بركاته

متشكرة جدا لحضرتك و متشكرة اكتر على زيارتك لمدونتي

اللي حدث في التصوير للوكاله الفرنسيه مش اكتر من اي تصوير لقناة تانية

تصوير مشاهد تدل على الصداقه بين اعضاء الراديو
و انتر فيو للاعضاء اللي حضروا التصوير و السؤال عن برامجهم و طريقة الاستفاده و الافادة من مطلقات راديو

و ان شاء الله هنزل الفيديو بتاع التصوير قريب عالفيس بوك

تحياتي لحضرتك

دعاء عويضه يقول...

شمس النهار

مامة المدونين كلهم

شوفتي الفرق بين الناس اللي بتفكر صح و الناس اللي ما بتفكرش

ما علينا ...
كان نفسنا موووووت تكوني معانا بس المشكله ان كتير اوي استبعد مشوار الزقازيق ماجاش غير عمرو الشامي بس

و ميرسيه ليكي و تسلمي و يسلم الراديو بيكي اكيد

غير معرف يقول...

دودو يا دودووووووووووووووووو

وحشااااانى وحشاااااااااااااانى

مبروك لمصر ياقمر
مبرووووووووووووك

دعاء عويضه يقول...

حنوناااااااااااااااا

وحشتيني يا جميله
اوي اوي اوييييييييييييييي

مبروك لكل المصريين يا قمر و مبروك ليكي نهاية الامتحانات و يااااااااا رب بالنجاح الساحق برده

شمس النهار يقول...

مبسوطة جدا اني شفتك

ربنا يسعدك

دعاء عويضه يقول...

شمس النهار

و انا مبسوطة اكتر و كان نفسنا نقعد معاكم و معاكي اكتر
بس كان فيه مشاوير تانية و كان لازم نروح بدري علشان السفر

بس تتعوض ان شاء الله

Mahmoud Ahmed يقول...

الراجل مش بس بكلمته الراجل برعايته لبيته و اسرته

بره بقي هما عندهم شعار سليم جدا

البني آدم مش باسمه ولا جنسيته ، النبي آدم بشغله و اهميته

ههههههههههه

طب هنشوف ولا هنسمع التسجيلات ده فين و ازي بقي ^_^ ؟؟

دعاء عويضه يقول...

سبايدرمان spiderman

ههههههههههههه
فعلا اهم حاجه عندهم شغلك و اهميتك في بلدك
فعلا بره ف اسلام بدون مسلمين

شكرا ليك سبيدرمان

دعاء عويضه يقول...

اه نسيت اقولك يا سبيدر مان
ان كل التسجيلات دي بنزلها على الفيس بوك
اول ما القناة بتبعتلنا ال cd

شاب فقرى يقول...

انا بعشق اكون فى اللقاءات
اكون انا اللى بسأل مش اللى بيتسأل
:)
زى ما قالوا لك عايزينها تكون ليها دور فى بلدها
هما كمان بيهتموا بالعمل وبس
مش شريط يكونوا فرنسيين اصلا
وكالة فرنسية بس الموظفين من اى مكان فى العالم
المهم الشغل والفكر اللى بيتقدم منبعه ايه ؟
يعنى القيادة والافكار فرنسية
انما الطبق ممكن يكون كندى
والمعلقة والشوكة امريكانى
فهمتى قصدى ؟
ابقى نزلى اللقاء دا فى المدونة بقى :)
انا بحب اهل الزقازيق اوى
ناس طيبين
وكل تعليق وانتى طيبة
شاب فقرى

دعاء عويضه يقول...

شاب فقري

في الاول بشكرك جدا على زيارتك لمدونتى و تعليقك عندي
و اسفه انى اتاخرت في الرد على التعليق لانى لسه واخده بالي من رقم زياده في تعليق الموضوع ده و كمان ما توقعتش انك تعلق عندي في موضوع قديم

بس بجد شكرا جدا ليك

و ميرسيه خالص على كلامك عن اهل الزقازيق و يا ريت تيجي نعزمك هنا تشرفنا و تنورلنا البلد زياده

بالنسبة لتعليقك عالبوست
اه فهمتك ربنا يستر من الناس اللي بره دول و دماغهم

و ان شاء الله اول ما نجيب السي دي بتاع اللقاء هنزل الفيديو بتاعه هنا

سلامي